Guvernatori i Bankës Qendrore të Kosovës, Fehmi Mehmeti, u prit në takim nga Guvernatorja Lisa DeNell Cook e SHBA-ve, shkruan Gazeta Infokus.

Në këtë takim është diskutuar për rolin që e ka BQK-ja në licencimin dhe mbikëqyrjen e rregullimin e institucioneve financiare në Kosovë si dhe për bashkëpunimin dhe përkrahjen e vazhdueshme që BQK ka nga SHBA-të.

Kjo vizitë e Mehmetit është e para e një guvernatori kosovarë që bëhet në zyrat e Bordit të Guvernatorëve të Rezervës Federale të SHBA-së

Njoftimi i plotë i BQK-së:

“Guvernatori Mehmeti u prit në takim zyrtar në Bordin e Guvernatorëve të Rezervës Federale të SHBA-së

Gjatë ditës së sotme, në zyrat e Bordit të Guvernatorëve të Rezervës Federale të SHBA-së, Guvernatori Mehmeti u prit në takim zyrtar nga Guvernatorja Lisa DeNell Cook.

Guvernatori Mehmeti fillimisht e njoftoi Guvernatoren Cook lidhur me rolin e Bankës Qendrore të Republikës së Kosovës në licencimin, mbikëqyrjen dhe rregullimin e institucioneve financiare në Kosovë. Gjithashtu, Guvernatorja Cook u informua për përkrahjen e vazhdueshme të SHBA-ve, që nga themelimi i BQK-së deri në ditët e sotme përmes institucioneve amerikane si: Thesari Amerikan, USAID dhe Rezerva Federale. Guvernatori Mehmeti shprehu falënderimin dhe mirënjohjen për kontributin e madh që shteti amerikan ka dhënë për zhvillimin e kapaciteteve të Bankës Qendrore të Republikës së Kosovës dhe për përkrahjen e vazhdueshme për zhvillimin e sektorit financiar në Kosovë.

Guvernatori Mehmeti informoi Guvernatoren Cook lidhur me performancën e mirë të sistemit financiar në Kosovë, me theks të veçantë atij bankar dhe potencoi rëndësinë e këtij sektori në mbështetje të zhvillimit ekonomik të vendit.

Po ashtu, Guvernatori Mehmeti shpalosi pikëpamjet e Bankës Qendrore të Republikës së Kosovës lidhur me zhvillimet makroekonomike në vend, si dhe parashikimet e Bankës Qendrore të Republikës së Kosovës për ekonominë e vendit, në vitet e ardhshme.

Në takim u diskutua bashkëpunimi i deritanishëm me Rezervën Federale si dhe mundësinë e zgjerimit dhe avancimit të bashkëpunimit të mëtejmë mes dy institucioneve. Gjithashtu, Guvernatori Mehmeti e ftoi për të vizituar Kosovën dhe Bankën Qendrore të Republikës së Kosovës, ftesë kjo e cila u mirëprit nga Guvernatorja Cook.

Njëherit kjo është vizita e parë e një Guvernatori të Bankës Qendrore të Republikës së Kosovës në zyrat e Bordit të Guvernatorëve të Rezervës Federale të SHBA-së”, thuhet në njoftimin e lëshuar nga BQK-ja./Gazeta Infokus/

EURO 2024 dhe Serie A, dy ekskluzivitetet absolute të Artmotion këtë vit

Sponsoruar