Lajme

Gashi për grevat: Opozita ka rënë në një frikë totale

Autori: Gazeta inFokus 21:20 | 22 September 2022

Analisti politik, Astrit Gashi, ka thënë se opozita në Kosovë, ka rënë në një frikë totale, dhe nuk po guxon sipas tij, të thotë se e përkrah grevën.

Gashi ka thënë, se opozita, po tenton që të distancohet në mes të kërkesave të sindikatave dhe grevës si veprim për t’i arritur ato kërkesa.

Sipas tij, nuk mund të jesh kundër grevës dhe pro kërkesave të sindikatave, teksa ka thënë se opozita po tenton të marrë përkrahje potenciale nga paaftësia e Qeverisë së Kosovës, për ta zgjidhur krizën.

-Advertisement-

Gashi, po ashtu ka thënë se duhet të ketë një ridefinim të opozitbërjes në Kosovë.

“Opozita po është ekstremisht e kujdesshme për me u quajt si opozitë në këtë temë. Opozita ka rënë në një frikë totale duke e bërë distancimin mes kërkesës dhe grevës. Edhe po don me marrë një përkrahje potenciale, ose me përfitu nga paaftësia e qeverisë me zgjidhë krizën me sindikatën. Duke thënë që unë e përkrahi rritjen e pagave, por po frikësohet ta bëjë betejën me qeverinë, që është me përkrahë grevën”, ka thënë Gashi.

“Ky është një sindrom që e ka kapë opozitën, ose ka hesape të pakryera me vetveten dhe ka frikë të ballafaqimit me pozitën, ose ka mungesë të guximit intelektual për t’i shkuar gjërave deri në fund, paraqitet më së thjeshti në këtë pikë. Pra jam për kërkesat por jam kundër grevës. Nuk mund të jesh kundër grevës dhe pro kërkesave”, ka vijuar ai.

Tutje, Gashi ka folur për Lidhjen Demokratike të Kosovës, duke e cilësuar opozitën e saj si të “kujdesshme”. Ai ka thënë se kur ishte kryeministër Avdullah Hoti, njëjtë sikurse Hekuran Murati, i kishte kërcënuar mësimdhënësit me ndalje të pagës nëse hyjnë në grevë.

Subscribe në YouTube: GAZETA INFOKUSI