Sport

Fundi i një epoke, Messi: “Betejat” e fundit për mua, Di Marian dhe Otamendin

Autori: Gazeta inFokus 11:00 | 10 July 2024

Argjentina është finalistja e parë e Kupës së Amerikës. Leo Messi me shokë mposhtën 2-0 një Kanada kurajoze dhe me të ardhme, sfidë ku “pleshti” realizoi golin e qetësisë. Ndërkohë që takimi u zhbllokua nga Julian Alvarez.

Skuadra e Lionel Scalonit pret fituesin e çiftit Uruguai-Kolumbi në finalen e 14 korrikut në “Hard Rock Stadium”, Florida. Argjentina është kampione në fuqi e këtij kompeticioni.

Në deklaratën e dhënë pas ndeshjes, Messi u ndal edhe te Angel Di Maria, shoku i shumë betejave, por edhe sukseseve tek Argjentina. Dy djemtë nga Rosario po plaken dhe kjo mund të jetë finalja e tyre e fundit së bashku.

-Advertisement-

“Le të shijojmë atë që po përjetojmë si Kombëtare, si grup. Nuk ishte e lehtë për ne të ktheheshim në finale dhe të konkurronim për t’u bërë sërish kampionë. Është shumë e vështirë, prandaj duhet ta shfrytëzojmë këtë mundësi.

Unë po e përjetoj si të gjithë sukseset e tjera me Argjentinën në kohët e fundit. Po argëtohemi shumë, por edhe jemi të ndërgjegjshëm për atë që po ndodh. Bashkë me Di Marian dhe Otamendin, sepse këto janë betejat e fundit…

Ka qenë një Kupë Amerike e komplikuar. Shumë e ashpër dhe me fusha të tmerrshme, temperatura të vështira për të luajtur futboll dhe kundërshtarë gjithashtu të tillë.

Fakti që jemi sërish në finale është diçka për t’u theksuar e festuar. Është finalja e katërt radhazi që do të luajmë. Le ta shijojmë këtë moment dhe dashtë Zoti që finalja të përfundojë si ajo e kaluara”, u shpreh legjenda argjentinase.