Lajme

Detaje se çfarë po ndodhë në pikat kufitare

Autori: Gazeta inFokus 09:48 | 01 August 2022

Qytetarët që janë nisur për të hyrë në Kosovë nga pika kufitare Dheu i Bardhë po presin deri në 90 minuta, ndërsa 40-60 minuta po presin në pikën kufitare Merdare.

Pritje më të madhe po bëjnë qytetarët e Kosovës që janë nisur për të kaluar në Serbi përmes Merdares. Ata po presin deri në 3 orë për të kaluar në këtë pikë kufitare.

Për dallim prej këtyre dy pikave kufitare, dy të tjera – Jarinjë dhe Bërnjak – janë mbyllur për qarkullim pas situatës së tensionuar mbrëmë në veri të Kosovës.

-Advertisement-

Ndërsa, sipas Qendrës Kombëtare për Menaxhim Kufitar, gjendja në pikat kufitare me shtetet tjera fqinje është stabile, pasi pritjet nuk janë më të gjata se 10 minuta.

Serbët lokalë më 31 korrik vendosën në rrugë kamionë dhe mjete të tjera të rënda për të kundërshtuar dy vendime të Qeverisë së Kosovës që kanë të bëjnë me targat dhe dokumentet serbe.

Pas kësaj, Qeveria u zotua se do të shtyjë zbatimin e vendimeve për një muaj, nëse serbët largojnë barrikadat e vendosura, ndërkaq në mesnatë janë lëshuar dokumentet e para për hyrje-dalje.

Vendimi i 29 qershorit i ekzekutivit kosovar parasheh lëshimin e dokumentit për hyrje-dalje për të gjithë personat që posedojnë dokumente serbe.

Praktikë të njëjtë Serbia ka aplikuar ndaj qytetarëve të Kosovës për vite me radhë.

Ndërkaq, vendimi i dytë parasheh që të gjithë pronarët e makinave me targa me akronime të qyteteve të Kosovës – që lëshohen nga Serbia – të mund të riregjistrojnë makinat e tyre në targat RKS (Republika e Kosovës).

Targat me akronime të qyteteve të Kosovës, nga Prishtina zyrtare konsiderohen ilegale, por vlerësohet se në veri të vendit, të banuar me shumicë serbe, qarkullojnë 10.000 makina me targa të tilla.

Për shkak të tensioneve në veri, Policia e Kosovës ka mbyllur dy pikëkalimet kufitare, Jarinjë dhe Bërnjak, dhe ka udhëzuar qytetarët që të përdorin pikëkalime të tjera.

Më 31 korrik, Policia raportoi se ka pasur të shtëna me armë zjarri në disa lokacione dhe disa kanë qenë drejtim të Policisë, por nuk ka pasur të plagosur.