Banka “Raiffeisen”, në një përgjigje për Gazetën Infokus, është deklaruar lidhur me rastin e kryetarit të Prishtinës, Përparim Rama, pasi kabineti i këtij të fundit ka pretenduar se një zyrtar i bankës ka pasur qasje të paautorizuar në llogarinë dhe transaksionet e tij bankare.

Nga banka kanë konfirmuar se kanë pranuar një ankesë nga kryetari Rama dhe se, pas hetimit dhe shqyrtimit të rastit, kanë ndërmarrë veprimet e nevojshme, përfshirë njoftimin e autoriteteve kompetente.

“Ju konfirmojmë se ankesa nga Kryetari i Prishtinës, z. Përparim Rama, është trajtuar në përputhje me kërkesat ligjore dhe rregullatore. Pas hetimit dhe shqyrtimit të rastit, kemi ndërmarrë të gjitha veprimet e nevojshme bazuar në ligjet dhe rregulloret në fuqi, përfshirë edhe njoftimin e autoriteteve kompetente”, thuhet në përgjigjen e bankës “Raiffeisen” për Infokus.

-Advertisement-

Megjithatë, banka nuk ka dhënë detaje nëse është konfirmuar qasja e paautorizuar apo nëse janë marrë masa ndaj ndonjë punonjësi, duke u thirrur në mbrojtjen e të dhënave personale dhe konfidencialitetin bankar.

“Sigurojmë klientët se Banka Raiffeisen i kushton rëndësi të posaçme mbrojtjes së të dhënave të tyre personale dhe ruajtjes së konfidencialitetit bankar. Në këtë fazë, nuk mund të ofrojmë hollësi të tjera lidhur me rastin”, përfundon përgjigjja e bankës.

Ndërkohë, kabineti i kryetarit të Prishtinës, në një përgjigje për Gazetën Infokus, ka pretenduar se një zyrtar i bankës “Raiffeisen” ka pasur qasje pa autorizim në llogarinë dhe transaksionet bankare të Ramës dhe se këto të dhëna janë shpërndarë te persona të tjerë.

Sipas kabinetit, banka e ka identifikuar punonjësin e përfshirë dhe e ka larguar nga puna. Megjithatë, këto pretendime nuk janë konfirmuar shprehimisht në përgjigjen që banka i ka dhënë Infokusit.

Nga Zyra e Ramës kanë paralajmëruar gjithashtu se do të ndjekin rrugët ligjore ndaj bankës dhe zyrtarit që dyshohet se ka kryer veprimet në fjalë.

VIVA FRESH E SHPALL KREEEEJT MUAJIN BLACK NOVEMBER!

Sponsoruar

-Advertisement-