Avdullah Hoti për Vetëvendosjen: Nuk liberalizohen vizat me njerëz që lidhin shirita të kuq rrugëve
Autori: Gazeta inFokus
15:00 | 08 February 2021
Kandidati për kryeministër të Kosovës nga radhët e Lidhjes Demokratike të Kosovës, Avdullah Hoti ka mbajtur tubim elektoral në Podujevë, ku ka kërkuar votën e qytetarëve të kësaj komune në zgjedhjet e 14 shkurtit.
Aty Hoti ka thënë se kanë plan të qartë për katër vitet e ardhshme nëse drejtojnë ekzekutivin, duke theksuar 4 miliardë euro investime në sektorin publik, riorganizim të sektorit shëndetësor dhe arsimit në Kosovë.
Në Podujevë, Hoti ka thënë se do fuqizojnë rendin dhe ligjin në Kosovë.
“Ne kemi plan të qartë për katër vitet e ardhshme për investime prej 4 miliardë euro në sektorin publik, prej të cilave 1 miliardë janë të planifikuara nga marrëveshja e Uashingtonit, ne kemi plan të qartë për shëndetësi, kemi me riorganizua sistemin shëndetësor ashtu që asnjë person me sëmundje kronike mos me pas mungesë të mjekut as barnave, kemi me u siguru që në asnjë spital nuk mungojnë barnat elementare, kemi me u siguru që nuk shpenzohen miliona euro në shërim jashtë vendit nga qytetarët e vendit dhe kemi me marrë veprime konkrete për këtë”, ka thënë Hoti.
Ai ka thënë se me të në krye të qeverisë, liberalizimi i vizave për kosovarët do të arrihet në fund të këtij viti.
“Veç me një qeveri të tillë të vendosur që fuqizon rendin, ligjin, kushtetutën, ne kemi me mbyllë vitin 2021 me liberalizim të vizave, sepse thjeshtë vetëm neve na besojnë, vetëm ne jemi anëtarë të Partive Popullore Evropiane. Njerëz që lidhin shirita të kuq rrugëve të qyteteve që promovojnë mentalitetin e të kaluarës nuk kanë vend në Evropë, nuk liberalizohen vizat me ta, nuk zhvillohet ekonomia me ta sepse ata bizneset i shohin vetëm si oligarkë për t’i shtypur, ne i shohim bizneset si mundësi për zhvillim dhe punësim”, ka thënë Hoti.
Para qytetarëve të Podujevës, Hoti ka folur për marrëveshjen e Uashingtonit, njohjen e Kosovës nga Izraeli e dërgimin e kontingjentit të FSK-së në misione paqeruajtëse me ushtrinë amerikane, duke i numëruar suksese të qeverisë që ai e ka drejtuar.
Hoti ka thënë se ka pasur guxim të përballet me tema të mëdha, që sipas tij, dy kryeministra para tij janë rrëzuar në pamundësi që të marrin përsipër procesin e dialogut Kosovë-Serbi.
Para qytetarëve të Podujevës ka folur edhe kandidati për deputet, Agim Veliu.
“Nuk do të lejojmë që dikush që synon pushtet absolut ta vë në sprovë partneritetin tonë me aleatët perëndimor dhe të rrëmojë mbi themelet e shtetit. Brigadat e kuqe promovuese të diktaturës komuniste, marksiste e leniniste, sistemit që i solli vetëm të këqija popullit shqiptar sërish kanë dalë në sipërfaqe për të mbjellë farën e së keqes, ata këto ditë, për të dëshmuar se kush janë po shpërndajnë e lidhin shirita të kuq gjithandej nëpër Kosovë, po e bëjnë këtë për të treguar se nëse do të realizojnë ëndrrën e tyre do ta skuqin Kosovën pas 14 shkurtit, por jo ne nuk do të t’i lejojmë”, ka thënë Veliu.
Ndërsa, kreu i Aleancës Kosova e Re, që në zgjedhjet e 14 shkurtit garojnë në listë të LDK-së, Behgjet Pacolli tha se LDK është partia që i duhet Kosovës.
“Asnjëherë mos të ketë dyshim se Lidhja Demokratike e Kosovës, Lidhja Demokratike e themeluar nga presidenti historik Ibrahim Rugova, e qon Kosovën aty ku duhet, e drejton Kosovën në drejtim të duhur dhe nuk duhet të mashtrohemi prej interferencave, prej njerëzve siç e tha edhe parafolësi, që kanë ardhur Zoti e di prej ku dhe duan ta kthejnë këtë vend në vitet 70, ne e dimë atë kohë, e dimë kobin e asaj kohe, prandaj t’i lëmë anash ata e të ecim përpara, si gjithmonë Podujeva ka treguar se është e Lidhjes Demokratike të Kosovës”, ka thënë Pacolli.

T� tjera
-
Ymeri-Kurtit: Je me mentalitet të vjetër, ki me ra shumë shpejt
Deputetja e LDK-së, Janina Ymeri, i është drejtuar kryeministrit Albin Kurti ...
-
Kuvendi mbetet në terr, ndërpritet seanca ku po diskutohej për buxhetin
Ndërprerja e energjisë elektrike ka lënë në terr sallën e Kuvendit të Kosovës...
-
Godet era e fortë, bien dritaret nga ndërtesa, dëmtohet një veturë
Në Matiqan të Prishtinës sonte nga një ndërtese kanë rënë dritaret dhe e kanë...
-
Aksident tragjik në rrugën Prishtinë-Podujevë, humb jetën një person me aftësi të kufizuara
Një aksident trafiku me fatalitet ka ndodhur në fshatin Penuhë të Podujevës, ...
-
Kuvendi në orar të zgjatur, deputetët ende në sallë plenare
Ndonëse ora ka kaluar 22:20, deputetët e Kuvendit të Kosovës ende nuk po i ja...
-
“Telekomi zyrë punësimi për familjarët e pushtetit”, Krasniqi akuzon pushtetin për nepotizëm
Rrezarta Krasniqi ka ngritur akuza për punësime dhe përfitime të familjarëve ...
-
Bajrami – Kurtit: Qe gjashtë vjet në pushtet, ka mbetë tu folë për të kalumen
Pas përplasjes në Kuvend mes kryeministrit Albin Kurti dhe deputetes së LDK-s...
-
Shiroka Pula në Forumin Ndërkombëtar të Strategjisë 2026: Të rinjtë e Kosovës janë të angazhuar në teknologji dhe informacion, njohin disa gjuhë të huaja
Presidentja e Republikës së Kosovës, Justina Shiroka Pula, takoi delegacionin...
-
Kurti e pranon se qytetarët po largohen nga vendi, gjendjen në arsim dhe drejtësinë i rendit si arsye kryesore
Kryeministri i Kosovës, Albin Kurti, ka folur në Kuvendin e Kosovës për migri...
-
Komandanti i Forcave Tokësore të FSK-së zhvillon takim me homologun nga Shqipëria
Komandanti i Forcës Tokësore të Forcës së Sigurisë së Kosovës, Gjeneral Briga...
-
Iu ndal fjala në Kuvend – Rrahmani i përgjigjet Kurtit
Deputeti i Partisë Demokratike të Kosovës, Eman Rrahmani, në emisionin “DPT t...
-
Hamza për buxhetin: Nuk garanton as mirëmbajtjen
Deputeti i Partisë Demokratike të Kosovës, Bedri Hamza, ka kritikuar projektb...

































