Rreth 70 punëtorë të kiosqeve në gjithë Komunën e Prishtinës rrezikojnë të mbesin pa punë, si shkak i një vendimi të ri të qeverisjes së kryeqytetit.

Në shpalljen e re për dhënien në shfrytëzim të këtyre kiosqeve, Komuna ka vendosur që ato t’i jap për ofertues të cilët në tri vjetët e fundit kanë pasur qarkullim prej 5 milionë euro, shkruan Gazeta inFokus.

Ata që duan të bëhen pronar të tyre, gjithashtu duhet të kenë një rrjet tregtar prej më së paku 5 marketeve të shitjes me pakicë në territorin e Prishtinës.

-Advertisement-

Sadudin Hasanin, që punon qe 20 vjet në një kioskë në kryeqytet, ky vendim ka merakosur shumë.

“Ma shumë se 70 persona aktualisht punojnë në 30 kioskat që ndodhen në Prishtinë. Gjithë këta rrezikojnë të mbesin pa punë”, thekson ai.

Hasani që është edhe përfaqësues i punëtorëve të këtyre kiosqeve që protestuan mëngjesin e së mërkurës para Komunës, thotë se në fillim nuk ishin të vendosura këto rregulla.

“Nuk kanë qenë këto kritere në fillim kur është votu. Kriteret i ka vendosë Komisioni që është marrë me këtë punë”, thotë ai.

“Me këto kushte po u bëhet gati tereni 3-4 marketeve të mëdha që funksionojnë në Kosovë që t’i marrin të gjitha kioskat sepse askush tjetër nuk i plotëson këto kritere”, vlerëson Hasani.

Me të pajtohet edhe asamblisti i Vetëvendosjes në Prishtinë, Eman Rrahmani.

Rrahmani thotë se kur vendosen kritere të tilla atëherë tenderin po e orienton tek 3-4 persona.

“Në momentin që i qet këto kritere, ku njëri prej tyre është 5 milionë euro dhe kriteri i dytë që me i pas pesë pika në kryeqytet, atëherë ti e orienton këtë tender në tre, katër persona, në tre, katër firma, për shkak se nuk ka kush tjetër t’i plotësojë këto kritere”, thekson ai.

Pasi tenderi është i ndarë në tri llote, Rrahmani thotë se do të ndahen për tri markete të ndryshme.

E kjo, sipas tij po bie ndesh me sloganin e partisë së të larguarve nga Vetëvendosje.

“Secili e ka atë një lloj të ardhur familjare. Janë 33 kiosqe që i bie se 33 familje do të mbesin pa të ardhura. Kjo po bie në kundërshtim edhe me kisne moton e Socialdemokratëve ‘Për shumicën që ka pak’, a realisht është ‘Për pakicën që ka shumë’”, ka thënë Rrahmani.

Sipas tenderit të shpallur, fituesit do të obligohen që t’i punësojnë 11 persona të cilët janë shfrytëzues aktual të këtyre kiosqeve dhe 9 persona të tjerë me nevoja të veçanta, sipas listës së ofruar nga Komuna.

Ankandi publik do të mbahet më 16 korrik në ora 14:00 në objektin e vjetër të Komunës. /Gazeta inFokus

VIVA FRESH E SHPALL KREEEEJT MUAJIN BLACK NOVEMBER!

Sponsoruar

-Advertisement-