Deklarimi i ministrit të Financave, Hekuran Murati se janë rritur depozitat e ekonomive familjare mbi shifrën katër miliardë euro, ka nxitur reagimin e deputetëve opozitarë.

Në mesin e reagimeve të bëra, deputetja e LDK-së, e cila më herët ka qenë ministre e Ekonomisë, Hykmete Bajrami, i ka reaguar ministrit Murati, duke theksuar se për shkak të çmimeve të larta një shoqëri është e zhytur në borxhe.

“Hekurani tha se për shkak të qeverisjes së LVV-së qytetarët po jetojnë më mirë dhe këtë ai e mbështeti në një fakt komplet të paqëndryshëm siç është rritja e depozitave familjare në banka. Por, derisa depozitat janë rritë për 1.5 miliardë euro, dhe këto nuk janë kurrëfarë treguesi i mirëqenies, hajde të tregojmë se sa sa janë rritë mbitërheqjet (overdraftet) e qytetarëve tonë në banka”, thotë ajo.

-Advertisement-

Deputetja ka shtuar më tej se “sipas të dhënave të Bankës Qendrore të Kosovës mbitërheqjet në banka janë rritë nga 152 milionë euro sa ishin në dhjetor të vitit 2018, në 502 milionë euro në gusht të vitit 2024”.

“Këto janë borxhe afat shkurtra që qytetarët i marrin në banka për të financuar kryesisht konsumin familjar (në plot raste qytetarët hynë minus në bankë kah data 20 e muajit aktual dhe mandej me të marrë pagën në fillim të muajit pasues e kthejnë këtë borxh)”, ka pohuar deputetja.

Pas kësaj, ka reaguar ministri Murati, duke pyetur nëse ka mbetur dikush në LDK që merr vesh në ekonomi.

“A ka mbetë najkush në LDK që merr vesh në ekonomi e financa me i tregu redaktores së portaleve se ku ka gabu me këtë grafikon, apo të gjithë ekonomistët e LDK-së janë kaq të kufizuar në njohuritë e tyre për temën? Komplet kreditë në sektorin bankar aktualisht janë 5.4 miliardë euro. Por sipas Hykmetes, vetëm mbitërheqjet e qytetarëve na qenkan 5.3 miliardë”, ka shkruar ministri.

Tutje, ai thotë se këso huqje vetëm ekonomistët e LDK-së mund të bëjnë.

“Përndryshe, sipas raportit të fundit të BQK-së, shifra e saktë e huamarrjes me maturitet deri në 1 vit për ekonomitë familjare është 57 milionë euro”, vijon reagimi.

Pas deklaratës së Muratit, deputetja ka ftuar ministrin për një përballje televizive.

“Hekuran, eja në studio flasim për huqjet e mia e tuat. Këto të dhëna janë janë të BQK-së, janë mjete që qytetarët i shfrytëzojnë përmes overdraftit. Shihe ku i ke shifrat për muajin dhjetor prej 2018 deri në 2023. E dita që ke me reagu, në emër të fjalës së lirë. Të pres në studio t’i shohim të dhënat së bashku”, ka thënë deputetja.

Ndryshe, deputetja Bajrami në vazhdimësi ka kritikuar vendimet e ministrit Murati.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-