Lajme

A do të vazhdojë rënia e çmimeve të naftës?

Autori: Gazeta inFokus 10:01 | 05 November 2026

Çmimet e naftës shënuan rënie të ndjeshme dje, të ndikuara nga rritja e shpresave për një zgjidhje të luftës me Iranin.

Nafta bruto Brent e Europës ra nën 100 dollarë për fuçi për herë të parë që nga 7 tetori. Kjo përfaqësoi një rënie prej gati 8 dollarësh, ose 8.3 për qind. Edhe nafta bruto amerikane, e njohur si West Texas Intermediate (WTI), ra me 8.3 për qind, duke e mbyllur tregtimin në rreth 88.12 dollarë për fuçi. Kjo ishte rënia më e madhe ditore e çmimit të naftës që nga prilli. Kjo mund të sjellë lehtësim për konsumatorët.

Por, a pritet të vazhdojë kjo rënie e çmimit?

-Advertisement-

Rënia e ndjeshme e çmimit të naftës që nga publikimi i rezultateve të zgjedhjeve të mesmandatit në SHBA tregon se tregu po e merr “qartazi si të mirëqenë rikthimin e plotë të rrugës diplomatike [mes SHBA-së dhe Iranit]”, thotë Bill Farren-Price, hulumtues i lartë në Institutin e Oksfordit për Studime të Energjisë.

Megjithatë, ai shton: “Mendoj se mund të jetë paksa e parakohshme”.

“Gjatë muajve të fundit kemi kaluar shumë herë nëpër situata të tilla dhe negociatat mes SHBA-së dhe Iranit janë mjaft të ndërlikuara”, thotë Farren-Price për programin Today.

Përveç kësaj, ai thotë se Irani do të synojë të marrë “çmimin më të lartë” në këmbim të rihapjes së plotë të Ngushticës së Hormuzit dhe lejimit të qarkullimit të lirë të anijeve tregtare.

Kujtojmë se shpërthimi i luftës me Iranin çoi në mbylljen de facto të Ngushticës së Hormuzit, një korridor kyç detar nëpër të cilin normalisht kalon rreth 20 për qind e naftës dhe gazit natyror të lëngshëm në botë. Pikërisht kjo ndërprerje bëri që çmimet globale të energjisë të shënonin rritje të menjëhershme.