Sport

Rashica “nxjerr” Schalken nga Bundesliga, (Video)

Autori: Gazeta inFokus 09:54 | 09 Mars 2019

Florian Kohfeldt ka vetëm fjalë të mira për Milot Rashicën, që shënoi dy gola spektakolar në fitoren e Werderit mbrëmjen e djeshme kundër Schalkes.

Talenti i Kosovës ka shkëlqyer në fitoren 4-2, që e rrëzon Schalken në zonën e ftohtë të tabelës.

Rashica shënoi fillimisht në minutën e 31’, duke barazuar rezultatin në 1-1.

-Advertisement-

Pas një paraqitje fantastike dhe tentativave të shumta, sulmuesi i “Dardanëve” u shpërblye dhe gjeti golin edhe në pjesën e dytë, në minutën e 73’, duke shënuar për 3-1,

Me golin e dytë personal në këtë takim, Rashica arrin në 5 gola në vitin 2019 në Bundesliga, aq sa sulmuesi i Bayern Munich, Robert Lewandowski.

Pas ndeshjes, trajneri i klubit gjerman, Florian Kohfeldt, pati vetëm fjalë të mira për 22-vjeçarin e Kosovës.

“Jam shumë i lumtur për të sepse është djalosh fantastik që punon shumë dhe ka kaluar nëpër një situatë të vështirë në fillim këtu. Në dhjetor të vitit të kaluar, atij i janë dhënë disa shanse. Është kritikuar, por është i ri dhe futbolli e ka kështu. Mënyra se si e shënoi golin e dytë, është fantastike”, u shpreh ai.