Kurti demanton propagandën 5 vjeçare të tij me vendim të ndalimit të importit nga Serbia
Autori: Gazeta inFokus
10:45 | 16 November 2026
Pesë vjet deklarata se nuk importohet rrymë nga Serbia, Kurti tani vendos ta ndalojë tregtimin që sipas tij “nuk ekzistonte” – Mbi 4 milionë euro importe sipas Doganës
Për vite me radhë, përfaqësues të Lëvizjes Vetëvendosje dhe vetë kryeministri Albin Kurti, kanë deklaruar se Kosova nuk importon më energji elektrike nga Serbia. Madje, pretendimet për importe të tilla janë cilësuar si dezinformata nga zyrtarë të Qeverisë.
Por më 16 nëntor 2026, kryeministri Albin Kurti njoftoi vendimin për ndalimin e tregtimit të energjisë elektrike me kompanitë serbe, duke e arsyetuar këtë masë me bllokimin e linjave ndërkufitare nga Serbia.
Vendimi vjen në një kohë kur të dhënat zyrtare të Doganës së Kosovës, të analizuara nga Gazeta Infokus, tregojnë se vetëm gjatë viteve 2024, 2025 dhe periudhës janar–tetor 2026, janë regjistruar importe të energjisë elektrike me origjinë nga Serbia në vlerë prej 4.109.893,45 eurosh.
Këto të dhëna krijojnë një kontrast të qartë me deklaratat e mëhershme kategorike se Kosova nuk importonte fare energji nga Serbia.
Kurti në vitin 2025: Nuk kemi blerë energji nga Serbia
Më 11 dhjetor 2025, kryeministri Albin Kurti kishte mohuar pretendimet për blerje të energjisë elektrike nga Serbia.
Në një paraqitje në Kanal 10, ai kishte deklaruar se mund të kishte pasur transmetim të energjisë nga Serbia përmes Kosovës, por kjo nuk nënkuptonte se Kosova kishte blerë energji nga ky shtet.
Kurti kishte theksuar se Qeveria nuk blen drejtpërdrejt energji elektrike dhe kishte përmendur KEK-un e KESCO-n si institucione dhe kompani të sektorit.
Megjithatë, më pak se një vit pas këtyre deklaratave, Qeveria ka vendosur të ndalojë tregtimin me kompanitë serbe.
Vendimi ngre pyetjen se cilat marrëdhënie tregtare synon t’i ndërpresë Qeveria.
Rizvanolli i quante dezinformata raportimet për importin nga Serbia
Edhe ministrja e Ekonomisë, Artane Rizvanolli, kishte kundërshtuar publikisht raportimet për importet e energjisë elektrike nga Serbia.
Në qershor 2025, ajo kishte deklaruar se tregtimi përmes linjave ndërkufitare Kosovë–Serbi ishte i bllokuar që nga viti 2020.
Rizvanolli kishte argumentuar se rrjedhat fizike të energjisë në linjat e transmetimit nuk mund të interpretoheshin automatikisht si importe tregtare.
Ky është një dallim teknik i rëndësishëm, por të dhënat doganore të analizuara nga Infokusi nuk bazohen në rrjedhat fizike të transmetimit. Ato përmbajnë regjistrime të importeve me origjinë të deklaruar nga Serbia.
Armend Muja në Kuvend: Nuk importohet më rrymë nga Serbia
Një nga deklaratat më kategorike ishte dhënë nga deputeti i Lëvizjes Vetëvendosje, Armend Muja, në seancën e Kuvendit të Kosovës më 23 shkurt 2023.
Duke iu referuar importeve të energjisë, Muja kishte deklaruar se nga ardhja e Qeverisë Kurti nuk importohej më energji elektrike nga Serbia.
Ai kishte pohuar se importet nga Serbia i përkisnin periudhës 2006–2020, ndërsa gjatë qeverisjes së Vetëvendosjes energjia importohej nga vende të tjera.
Edhe në maj të vitit 2022, Muja kishte deklaruar publikisht se gjatë Qeverisë Kurti nuk ishte importuar fare energji elektrike nga Serbia.
Ndërkaq, në dhjetor 2024, ai kishte përsëritur se Serbia e kishte humbur tregun e Kosovës dhe se në vitet e fundit nuk importohej më energji prej saj.
Dogana: Mbi 4.1 milionë euro importe gjatë tri periudhave
Sipas dokumenteve origjinale të Doganës së Kosovës, të analizuara nga Gazeta Infokus, vlera e importeve të energjisë elektrike me origjinë nga Serbia ka qenë:
- 2024: 163.438,99 euro.
- 2025: 3.234.127,98 euro.
- Janar–tetor 2026: 712.326,48 euro.
Në total, gjatë këtyre periudhave janë regjistruar importe në vlerë prej 4.109.893,45 eurosh.
Veçanërisht bie në sy tetori i vitit 2026, kur vlera e importit arriti në 604.882,35 euro.
Kjo shumë përbën rreth 85 për qind të importeve me origjinë nga Serbia të regjistruara gjatë dhjetë muajve të parë të vitit.
Në shtator nuk ishte regjistruar import i tillë, ndërsa në gusht vlera kishte qenë vetëm 12.121,52 euro.
Kështu, vetëm pak javë përpara vendimit të Qeverisë për ndalimin e tregtimit me kompanitë serbe, Dogana kishte regjistruar një nga vlerat më të larta mujore të importeve nga Serbia gjatë vitit 2026.
Çfarë ndalon vendimi i Kurtit dhe çfarë mbetet pa u sqaruar?
Kryeministri Kurti e ka arsyetuar vendimin e 16 nëntorit me bllokimin e linjave ndërkufitare nga Serbia, duke paralajmëruar masa të tjera nëse nuk ka ndryshim të qëndrimit të Beogradit.
Megjithatë, ekziston një dallim ndërmjet tregtimit me kompani të regjistruara në Serbi, importit të energjisë me origjinë serbe dhe tregtimit përmes linjës së drejtpërdrejtë ndërkufitare Kosovë–Serbi.
Autoritetet kosovare kanë deklaruar se tregtimi përmes kësaj linje është i bllokuar që nga viti 2020, ndërsa furnizimi mund të realizohet përmes rrugëve të tjera.
Por të dhënat e Doganës dëshmojnë se deklaratat kategorike për mungesën e çdo importi të energjisë me origjinë nga Serbia nuk përputhen me regjistrimet doganore për vitet 2024–2026.
Tashmë mbetet të sqarohet se cilat kompani kanë realizuar këto importe, nga cilët operatorë është blerë energjia dhe cilat kontrata konkrete do të preken nga vendimi i Qeverisë./Gazeta Infokus

T� tjera
-
Rryma në dimër, Rizvanolli: Po përpiqemi maksimalisht që kostot e furnizimit të mos rriten
Ministrja e Ekonomisë, Artane Rizvanolli ka folur për mundësinë e rritjes së ...
-
Çitaku: Keqardhja e komisioneres Kos nuk mjafton, kërkojmë sqarim, kërkimfalje dhe garanci për mospërsëritje
Ushtruesja e detyrës së kryetares së PDK-së, Vlora Çitaku, ka reaguar pas dek...
-
Ymeri-Qeverisë: E konfirmuat se kishte tregti të energjisë me Serbinë, por jeni shumë vonë ta nxirrni Kosovën nga kjo “fajde”
Deputetja e LDK-së, Janina Ymeri ka reaguar menjëherë pasi Qeveria Kurti 4 ka...
-
Bajrami për ndërprerjen e tregtimit të rrymës me Serbinë: Tash po shiten si patriotë
Deputetja e LDK-së, Hykmete Bajrami, ka reaguar pas vendimit të Qeverisë së K...
-
Kurti për dekretimin e Ligjit për Byronë: Kapitull i ri për drejtësi dhe barazi
Kryeministri i Kosovës, Albin Kurti, në mbledhjen e sotme të Qeverisë ka folu...
-
Pas mbi 4 milionë eurove importe të rrymës direkt nga Serbia, Kurti vendos ta ndalojë tregtimin me kompanitë serbe
Qeveria e Kosovës ka miratuar të hënën vendimin për ndalimin e tregtimit të e...
-
Dogana mbledh mbi 1.7 miliard euro për 10 muaj, ja sa u rritën të hyrat
Dogana e Kosovës ka mbledhur mbi 1.7 miliard euro gjatë 10 muajve të parë të ...
-
Kos ua lë fajin muzikantëve për melodinë nacionaliste në “Forumin e zgjerimit”
Komisionerja për Zgjerim, Marta Kos ka shprehur keqardhjen për muzikën e këng...
-
Aksidenti në tunelin e Murrizit, kjo është mjekja që humbi jetën
Doktoresha Maltina Ferati nga Tetova, është një nga viktimat e aksidentit të ...
-
Qeveria miraton vendimin, ndërpritet tregtimi i rrymës me kompanitë nga Serbia
Qeveria e Kosovës ka miratuar propozim vendimin, për ndalimin e tregtimit të ...
-
Tahiri kërkon reagimin zyrtar të BE-së ndaj këngës nacionaliste serbe: Kosova të intensifikojë diplomacinë me SHBA-në
Tahiri kërkon reagimin zyrtar të BE-së ndaj këngës nacionaliste serbe: Kosova...
-
Kurti: Do ta ndalojmë tregtimin e energjisë elektrike me kompanitë serbe
Kryeministri Albin Kurti, ka bërë të ditur se Qeveria do të marrë sot tri ven...


































