Ministri i Shëndetësisë, Arben Vitia, ka pranuar se furnizimi me barna për nevojat e Klinikës së Onkologjisë gjatë vitit 2026 nuk ka qenë në nivelin e duhur.

Duke iu përgjigjur pyetjeve në interpelancën e thirrur në Kuvendin e Kosovës, lidhur me mungesën e barnave onkologjike dhe vdekjen e një pacienteje me kancer që kishte mbetur katër muaj pa terapi, Vitia ka renditur disa nga arsyet që kanë ndikuar në mungesën e barnave.

Ai ka përmendur mungesën e autorizimeve për disa barna, vonesat në furnizim për shkak të procedurave, dështimin e tenderëve për shkak të mungesës së ofertuesve, si dhe rastet kur ofertat kanë tejkaluar shumën e parashikuar në bazë të çmimeve zyrtare të barnave.

Vitia ka bërë të ditur gjithashtu se një raport i auditimit të brendshëm, i iniciuar nga Ministria, ka evidentuar raste të vonesave ku zyrtarët kanë mundur të reagojnë më herët.

Për këto raste, sipas tij, janë iniciuar procedura disiplinore dhe pritet që komisioni disiplinor të marrë vendimet përkatëse.

Ministri ka përmendur si barna me vonesa në furnizim Palbociklibin, Bevacizumabin (Avastin), Dabrafenibin, Bicalutamidin dhe Sorafenibin.

Duke iu referuar raporteve të SHSKUK-së, QKUK-së dhe Klinikës së Onkologjisë, Vitia ka paraqitur edhe numrin e pacientëve që nuk e kanë marrë terapinë në klinikë për shkak të mungesave, por e kanë siguruar atë në mënyrë private.

Sipas të dhënave të prezantuara nga ai:

Palbociclib: 70 pacientë janë përballur me mungesë, dy cikle mungesë

Bevacizumab (Avastin): Rreth 70 pacientë, me mungesë që ka zgjatur rreth 13 javë.

Dabrafenib: 12 pacientë, me mungesë prej 20 javësh.

Bicalutamide: Rreth 70 pacientë, me mungesë prej 12 javësh.

Sorafenib: 14 pacientë, me mungesë prej tetë javësh.

Vitia ka thënë se, sipas raportimeve dhe dokumenteve të Klinikës së Onkologjisë, secili pacient është vlerësuar individualisht dhe për secilin është hartuar raport përkatës.

 “NUK KA TERAPI, BLENI VETË!” – Pacientët me kancer ngrenë alarmin për mungesën e barnave në QKUK