Ekonomi

Deklarata skandaloze e ministres Rizvanolli, në vitin 2022 inflacioni ishte në kulm duke prekur 12%, ajo thotë që nuk ka pasur

Autori: Gazeta inFokus 15:16 | 29 May 2025

Ministrja e Ekonomisë në detyrë, Artane Rizvanolli, sot ka mbajtur një konferencë për media me të cilën mohoi ekzistencën e inflacionit të lartë gjatë vitit 2022, shkruan Gazeta Infokus.

Ajo pranoi se kishte shtrenjtim të energjisë elektrike, por tha se kjo gjw nuk kishte ndikuar në rritje të përgjithshme të inflacionit.

“Shtrenjtimi ka ndodhur edhe në vitin 2022 prej 15%, mirëpo nuk ka pasur inflacion, pikërisht që po preken bizneset më shumë që kanë zë më të fuqishëm është duke u bë e gjithë kjo zhurmë dhe po bëhet zhurmë edhe më shumë për një liberalizim të 1% të kompanive, sesa për rritje të tarifave për të gjithë qytetarët”, ka deklaruar Rizvanolli.

-Advertisement-

Megjithatë, të dhënat zyrtare nga Agjencia e Statistikave të Kosovës tregojnë se norma mesatare vjetore e inflacionit për vitin 2022 arriti në mbi 12%, duke shënuar një nga nivelet më të larta të dekadës së fundit.

Gjatë atij viti, qytetarët gjithashtu përjetuan rritje të theksuar të çmimeve në ushqime, produkte bazë, energji dhe karburante, duke ndikuar ndjeshëm në standardin e jetesës.

Kjo konferencë e Rizvanollit erdhi si pasojë e protestës së organizuar nga bizneset kundër kalimit në tregun e lirë për furnizim me energji elektrike.

Ajo e quajti të papranueshme mënyrën e protestës së disa bizneseve, duke i akuzuar ato për instrumentalizim të punëtorëve, qytetarëve dhe mediave./Gazeta Infokus/