Lajme

Rama krah liderëve të evropianë: Shqipëria ka bërë më shumë se kurrë për Kosovën

Autori: Gazeta inFokus 20:24 | 05 October 2023

Kryeministri i Shqipërisë, Edi Rama, është deklaruar nga Spanja ku mori pjesë në Samitin e Komunitetit Politik Evropian, në Granada. Nga aty, teksa ka folur për qëndrimin e Shqipërisë ndaj sulmit terrorist në Banjskë, Rama ka thënë se “Shqipëria ka bërë më shumë se kurrë për Kosovën”.

Nga Granada e Spanjës, ku po merr pjesë në takime me liderë të BE-së, Rama u shpreh se Shqipëria është për të qenë në funksion të Kosovës, me zërin e vet.

“Unë vazhdoj të bëj timen, vazhdoj t’i qëndroj një për një bindjeve të mia. Janë bindje që burojnë nga një vizion strategjik i rolit të Shqipërisë në rajon, dhe i marrëdhënieve të Shqipërisë me Kosovën, në funksion të cilës, Shqipëria ka bërë më shumë se kurrë ndonjëherë atë që duhet të bëjë, por Shqipëria nuk është për të mbajtur iso për çdo gjë që thuhet, në bazë të analizës që në të drejtën e tyre bëhet në Prishtinë. Shqipëria është për të qenë në funksion të Kosovës, me zërin e vet”, ka deklaruar ai para mediave.

-Advertisement-

Ai i pati dy fjalë edhe për kritikat që ka marrë nga akterë politikë por jo vetëm në Kosovë, për qëndrimet e tij karshi tensioneve me Serbinë, të cilat i ka quajtur “kanale të ujërave të zeza të patriotizmit”.

“Nga ana tjetër, kam parë po ashtu, siç gjithmonë në këto raste, shpërthejnë të gjitha kanalet e ujërave të zeza të kinse patriotizmit, që siç thotë ajo fjala, është streha e fundit e maskarenjve”, theksoi ai.

Kreu i qeverisë shqiptare foli edhe për çështjet e tjera që u diskutuan në tryezat e rrumbullakta me liderët e vendeve të tjera.

“Këtu formati është me tryeza të ndryshme. Pasi kemi bashkëdrejtuar me kryeministrin e Suedisë për inteligjencën artificiale kemi pasur edhe të tjera, me atë të ltalisë dhe Presidentin Macron për çështjen e lobimit dhe emigracionin e paligjshëm”.

Subscribe në YouTube: GAZETA INFOKUSI