FOKUSI NË BUJQËSI

Shiu i pranverës mund t’iu shkaktojë vonesa bujqve

Autori: Gazeta inFokus 11:46 | 08 May 2023

Moti me shi solli lajme të mira për shumë qytetarë me faktin se mbushi rezervuarët e ujit të pijshëm, dhe ua hoqi gajlen atyre se do të mbesin pa ujë gjatë verës.

Por, janë bujqit ata të cilët mund të mos e mirëpresin parashikimin e Institutit Hidrometeorologjik të Kosovës se do të ketë të reshura edhe gjatë javës së dytë të muajit maj.

Zakonisht misri mbillet në mes të prillit, por duke e pasur parasysh motin e lagësht, disa bujq mund të kenë vendosur që atë ta shtyjnë për ndonjë ditë më të mirë. Tani që edhe maji po merr me shi, ata mund të jenë vonuar në procesin e mbjelljes.

-Advertisement-

Klankosova.tv e ka kontaktuar kryetarin e Federatës Sindikale të Bujqve të Kosovës, Tahir Tahirin, për ta pyetur nëse ky mot mund të paraqesë probleme në sektorin e bujqësisë dhe përgjigjja e tij është se të reshurat e mëdha të shiut mund të paraqesin pengesa në përfundimin e mbjelljeve pranverore.

Tahir Tahiri
Tahir Tahiri – kryetar i Federatës Sindikale të Bujqve të Kosovës

“Vështirësi kanë një numër i madh i bujqve sepse këto të reshurat kanë bërë që ende të ketë lagështi të tepruar që nuk po ua mundëson bujqve që të bëjnë përgatitjet për mbjellje”.

“Nëse vazhdon të ketë ende të reshura, pengesa kryesore ka me qenë për përfundimin e mbjelljeve pranverore – sidomos të misrit dhe perimeve”.

Sipas tij, së shpejti vjen koha kur duhet të fillohet me kultivimin e perimeve në fushë të hapur dhe nëse ka të reshura të vrullshme të shiut, atëherë kjo do t’ua pamundësojë kultivimin bujqve.

“Përndryshe, nëse ka të reshura normale, kjo nuk do të paraqet pengesa. Mirëpo, të reshurat e deritanishme, kanë shkaktuar vonesa në mbjelljen e patateve dhe misrit”.

I pyetur rreth anëve pozitive të këtij moti, ai ka thënë se gruri ka pasur lagështi të mjaftueshme dhe se deri më tani është në gjendje shumë të mirë.

“Sa i përket liqeneve akumuluese, po ajo është pozitive. Edhe për grurin ka ndikuar pozitivisht sepse gruri ka pasur lagështi të mjaftueshme dhe deri më tani është në gjendje shumë të mirë. Kuptohet ata që i kanë aplikuar masat e duhura”.

Kujtojmë se prilli kaloi me të reshura të bollshme shiu dhe sipas Institutit Hidrometeorologjik të Kosovës, duket se njësoj do të kalojnë edhe dy javët e para të muajit të pestë të këtij viti.

Subscribe në YouTube: GAZETA INFOKUSI
Etiketa:
Birra të ftohta e me shumë ZBRITJE veç në Viva Fresh!
-Advertisement-

Të tjera

Fokusi

fokusi-ne-bujqesi