Rozë

Chelsea nuk heq dorë nga “ylli” i Benfikës, ofron shumën rekord

Autori: Gazeta inFokus 10:09 | 31 Janar 2023

Chelsea ka ofruar 120 milionë euro (më shumë se 105 milionë stërlina) për të transferuar në Londër mesfushorin argjentinas të Benfikës, Enzo Fernandez. E shkruajnë mediat britanike, duke nënvizuar se, nëse operacioni kompletohet, do të shënonte një rekord për futbollin anglez, duke eklipsuar 100 milionë stërlinat që Manchester City ia pagoi Aston Villas për Jack Grealish në vitin 2021.

Fernandez u zgjodh lojtari i ri më i mirë i turneut në Kupën e Botës në Katar, e fituar nga Argjentina. Ai ka kohë që është objektiv i bluve, por deri më tani klubi portugez ia kishte mbyllur derën çdo oferte.

Mesfushori 22-vjeçar u ble nga Benfica verën e kaluar (ishte pjesë e River Plate) për 10 milionë stërlina, vlerë që me sa duket do të dhjetëfishohet në pak muaj.

-Advertisement-

Chelsea, i blerë nga miliarderi amerikan Todd Boehly, ka shpenzuar tashmë këtë janar mbi 180 milionë stërlina (rreth 204 milionë euro) për të blerë ukrainasin Mykhailo Mudryk, David Fofana (Bregu i Fildishtë), francezin Benoit Badiashile, brazilianin Andrey Santos dhe anglezin Noni Madueke, si dhe huazimin e sulmuesit portugez Joao Felix nga Atletico Madrid.