Uellsi, Hungaria apo Sllovakia?Bileta e fundit nga Grupin E
Autori: Gazeta inFokus 09:37 | 19 November 2019
Faza eliminatore për Kampionatin e 16-të Europian është shumë pranë mbylljes e duke përfshirë edhe dy skuadrat përfaqësuese që kaluan nga Grupi D tashmë numri i ekipeve që kanë siguruar pjesëmarrjen për në fazën finale të vitit tjetër është ngjitur në 19. Pra, mbetet thjesht një vend i vetëm për të plotësuar numrin 20 të kombëtareve që kualifikohen në mënyrë të drejtpërdrejtë nga 10 grupet e Kontinentit të Vjetër, ndërsa sa i përket pjesës së mbetur, siç dihet, katër vendet e fundit do të prenotojnë biletën nëpërmjet sfidave të fazës play off, që do të përcaktohen në bazë edhe të rezultateve të edicionit të parë të Ligës së Kombeve.
Ekipi i fundit pra do të dalë me shumë gjasa nga dueli Uells-Hungari, që do të mbahet në orën 20:45 në Ishull, në stadiumin e Cardiff City-t. Ky takim është i vlefshëm për Grupin E, ku Kroacia siguroi kualifikimin vetëm pak ditë më herët, falë suksesit 3-1 në Rijekë ndaj Sllovakisë. Sidoqoftë, rëndësi të veçantë paraqet gjithashtu edhe ndeshja Sllovaki – Azerbajxhan, që do të luhet në Tërnavë, në të njëjtën orë, sepse nëse Uellsi dhe Hungaria barazojnë në Kardif atëherë në rast të një suksesi në shtëpi ndaj Azerbajxhanit për në Europian kualifikohet pikërisht ekipi sllovak, për shkak të bilancit më të mirë në sfidat direkte me përfaqësuesen maxhare.
Aktualisht, pas 7 ndeshjeve të para, gjendja në Grupin E është e tillë: Hungaria pozicionohet në vendin e dytë në kuotën e 12 pikëve, Uellsi ndjek me 11, ndërsa në vendin e katërt renditet Sllovakia me një pikë më pak. Në mënyrë të kuptueshme ekipi i drejtuar nga trajneri Ryan Giggs do të kualifikohej automatikisht në rast të një fitoreje të mundshme, por, sidoqoftë, me 3 pikë në këtë takim do të garantonte pjesëmarrjen gjithashtu edhe ekipi hungarez. Në Francë, tre vjet më herët, “dragonjtë” nën drejtimin e trajnerit Chris Coleman bënë debutimin në fazën finale të Kontinentit të Vjetër, ndërsa Hungaria u rikthye në një Europian për herë të parë pas plot 44 vjetësh.
Gjërat kanë ndryshuar dhe tani Uellsi është favorit për të garantuar kualifikimin, duke patur parasysh formën tepër të dobët që po kalon ekipi maxhar. Nën drejtimin e trajnerit Marco Rossi ekipi fitoi 3 nga 4 sfidat e para në grup, duke kryesuar vazhdimisht, megjithatë në dy muajt e fundit, duke përfshirë natyrisht edhe ndeshjet miqësore hungarezët kanë humbur 4 nga 5 takimet e fundit, në një kohë kur “dragonjtë” mbajtën kundërshtarë si Sllovakia dhe Kroacia në barazim, për të mundur Azerbajxhanin 2-0 brenda në Baku, vetëm pak ditë më parë.
55-vjeçari piemontez do të ketë probleme të mëdha me formacionin, për arsye dëmtimi, gjithsesi Hungaria nuk ka fituar asnjëherë brenda në Uells. “Dragonjtë” kryesojnë bilancin e përgjithshëm të 11 ndeshjeve, 5-4 me fitore, ndërsa sa u përket sfidave brenda në Uells vendasit kanë fituar 3 dhe barazuar vetëm 1 në 4 sfidat ndërmjet këtyre dy skuadrave përfaqësuese.
Në Grupin C llogaritë janë mbyllur përfundimisht, kështu që ndeshjet e orës 20:45, Gjermani – Irlandë e Veriut dhe Holandë – Estoni luhen thjesht për statistika, gjithsesi nëse “panzerat” dhe “portokallinjtë” fitojnë sfidat respektive atëherë gjithçka mbetet si më parë dhe “mannschaft” do të ruajë vendin e parë.
E njëjta situatë pak a shumë përsëritet edhe në duelin Maqedoni e Veriut – Izrael, sepse në Grupin F janë kualifikuar Spanja me Suedinë. Në fund hapësirë në Supersport do të ketë gjithashtu edhe për takimin miqësor Brazil – Kore e Jugut. Ndoshta ndeshja e duhur për “verdhjeshilët” e Tites, duke patur parasysh që pak ditë më parë “Seleçao” u mund minimalisht në Arabinë Saudite nga Argjentina e Mesit. Nga Riadi “pentakampeonët” këtë herë do të zhvendosen në Emiratet e Bashkuara Arabe, në stadiumin “Mohammed Bin Zayed”, në Abu Dabi, ku në orën 14:30 Brazili do të bëj çmos për t’u kthyer në rrugën e duhur, duke patur parasysh që skuadra e Tites numëron tashmë plot pesë ndeshje pa fitore.
Të tjera
-
Statistikat e BQK: Qytetarët morën kredi në vlerë prej 241 milionë euro gjatë marsit, i depozituan rreth 70 milionë
Mbi 241 milionë euro është vlera e kredive të reja të marra nga qytetarët e K...
-
Departamenti amerikan i Shtetit: Ne sponsorizojmë me krenari rezolutën për Srebrenicën
Shtetet e Bashkuara të Amerikës janë krenare që sponsorizojnë propozimin për ...
-
Kur do t’i hiqen Kosovës masat e vendosura nga BE-ja
Bashkimi Evropian nuk ka treguar shenja konkrete se Kosovës do t’i hiqen masa...
-
Nga VV-ja thonë se nuk ka nevojë për raporte shtesë: BE-ja t’i heq masat ndaj Kosovës
Njërin nga kushtet që e kishte Kosova që Bashkimi Evropian t’ia heq masat ndë...
-
Hashim Thaçi sot ka ditëlindjen
sh-presidenti i Kosovës, Hashim Thaçi, feston sot 56-vjetorin e lindjes. A...
-
Sot mbahen zgjedhjet për president në Maqedoni të Veriut, në garë shtatë kandidatë
Qytetarët e Republikës së Maqedonisë së Veriut sot nga ora 7 deri në 19 do të...
-
Rohde: Për t’u anëtarësuar në KiE, Kosova duhet të bëjë “hapa të prekshëm” për Asociacionin
Ambasadori i Gjermanisë në Kosovë, Jorn Rohde, ka thënë se Kosova duhet të bë...
-
Ja emrat e dekanëve të rinj të Universitetit të Prishtinës
Dje, në Universitetin e Prishtinës, është zhvilluar procesi i zgjedhjes së de...
-
Kurti: Besojmë që Franca ta mbështesë Kosovën në KiE pa parakushte
Kryeministri i Republikës, Albin Kurti ka thënë se në bisedën e sotme telefon...
-
U kërcënua se mbështeti Kosovën në KiE, i ofrohet mbrojtje policore deputetit boshnjak
Policia e Bosnje dhe Hercegovinës, i ka ndarë mbrojtje të afërt deputetit, Sa...
-
Mot me diell dhe vranë, temperaturat shënojnë rritje
Për të mërkurën në Kosovë parashikohet të mbajë mot me vranësira dhe interval...
-
Vasfije Krasniqi: Çdo ditë e kujtoj tmęrrin që më ndodhi nga forcat serbe
Vasfije Krasniqi Goodman është kthyer në një grua simbol dhe heroinë për shum...