Lajme

Tiranë, mbahet takim i liderëve të BE-së me ata të Ballkanit Perëndimor

Autori: Gazeta inFokus 07:29 | 06 December 2022

Kryeministri i Shqipërisë, Edi Rama do të jetë sot mikpritës i udhëheqësve të Bashkimit Evropian dhe vendeve të Ballkanit Perëndimor, për një takim njëditor që synon rigjallërimin e procesit të zgjerimit.

Të martën në Tiranë mbahet takimi i nivelit të lartë mes udhëheqësve të Bashkimit Evropian dhe vendeve të Ballkanit Perëndimor. Lufta në Ukrainë e ka kthyer çështjen e zgjerimit në krye të axhendës së bllokut evropian, pas disa vitesh zvarritjeje e pengesash. Kryeministri Edi Rama tha se takimi njëditor është tregues i interesit gjeostrategjik që Evropa ka ndaj rajonit raportojnë mediat.

Kryeministri shqiptar Edi Rama ka deklaruar se një samit i Bashkimit Evropian në kryeqytetin e Shqipërisë këtë javë demonstron interesat e rritura gjeostrategjike të BE-së në rajonin e Ballkanit Perëndimor për shkak të luftës së Rusisë në Ukrainë.

-Advertisement-

“Momenti është fantastik. Askush nuk mund ta imagjinonte dy vjet më parë dhe tani po ndodh”, ka thënë Ramam, mbrëmë, në një intervistë për ”Associated Press”.

Ndërsa për sot, Partia Demokratike, ajo pjesë e saj që drejtohet nga ish-kryeministri Sali Berisha, ka paralajmëruar zhvillimin e një proteste në mbrojtje të vlerave europiane, të cilat siç tha zoti Berisha po kërcënohen nga kryeministri Rama.

Presidenti i Serbisë, Aleksandër Vuçiq, konfirmoi se do të marrë pjesë në samitin midis BE-së dhe shteteve të Ballkanit Perëndimor, që mbahet në Tiranë. Më herët, kryeministrja e Serbisë, Ana Bërnabiq, deklaroi se Serbia nuk do të merrte pjesë në këtë samit.