Të amnistosh kapadainjtë
Autori: Gazeta inFokus 11:34 | 22 December 2017
Shkruan: Imer Mushkolaj
Nuk ka sinjal më të keq për një shoqëri se të amnistosh, madje edhe t’i shpërblesh shkelësit e ligjit. Nuk është as e moralshme, e as e ligjshme të thuash se nuk bëhet kiameti nëse një ministër gjuan me armë dhe të mos marrësh masa ndaj tij, t’iu falësh borxhe milionëshe biznesmenëve të caktuar, të shpërblesh ata që shantazhojnë për të përfituar nga shteti. Kapadainjtë duhet ndëshkuar, jo amnistuar e shpërblyer
Në vend se të hetohen nga organet përkatëse, amnistohen dhe shpërblehen. Kështu po ndodh me individë e zyrtarë politikë, të cilët zgjedhin ta sfidojnë ligjin, ta sfidojnë shtetin, në përpjekje për të përfituar, për t’u shfaqur të fortë, kapadainj.
Ministrin Dardan Gashi e kanë parë të gjithë teksa ka shtënë me armë në një aheng, por kjo doli të mos jetë problem për shefin e tij. Në vend që të paktën të distancohet nga veprimi antiligjor i tij, kryeministri Ramush Haradinaj tha publikisht se as që ka biseduar me të për këtë çështje, madje pranoi se gjuan me armë edhe vetë në raste të caktuara.
Ky është një mesazh shqetësues për të gjithë qytetarët e Kosovës, të cilët presin të qeverisen nga ligji, e jo nga Kanuni. Traditat duhet respektuar e konservuar, por jo kthyer në doktrinë qeverisëse të shtetit.
Në një vend normal, organet përkatëse do të duhej të reagonin shpejt dhe ministri Gashi do të duhej marrë dënimin e merituar. Por në Kosovë, ku shkelja e jo respektimi i ligjit është kthyer në normë, nuk ndodh kështu. Kapadainjtë tolerohen e respektohen.
Po të ishte ndryshe, ndëshkimi nuk do të vononte. Siç nuk do të vononte as për ata të cilët kanë pranuar që shqiptarët të paguajnë rrymën e shpenzuar nga serbët kosovarë.
Nuk mund të quhen ndryshe, pos kapadainj, ata që kanë vendosur të dëmtojnë secilin prej nesh, ta plaçkitin secilin prej nesh, duke na shtuar në fatura rrymën e shpenzuar nga serbët. Me të drejtë qytetarët duhet të protestojnë jo vetëm për të refuzuar që kjo të vazhdojë, por edhe për të kërkuar që t’u kompensohen paratë e vjedhura. Po ashtu, përgjegjësit duhet hetuar dhe ndëshkuar. Krimi nuk është ndryshe. Dikush duhet të shkojë në burg.
* * *
Krim është edhe të provosh që të përfitosh nga shteti atë që nuk të takon, duke gënjyer e mashtruar, duke shantazhuar. I tillë është rasti i shumë banorëve të Hades e Shipitullës, të cilët ndërtuan dhjetëra shtëpi, jashtëligjshëm, vetëm me qëllimin që të dëmshpërblehen dhe të përfitojnë nga paratë tona. Dhe, kur erdhi puna që vendi të futet në kolaps energjetik, në mungesë të thëngjillit që gjendet poshte shtëpive të tyre, me ta nuk u morën organet e ndjekjes. Me ta u mor kryeministri Haradinaj, i cili arriti marrëveshje për shpronësim. Një marrëveshje, të cilën ata e pranuan me zor, ngase kërkonin edhe më shumë. Por, pavarësisht marrëveshjes që u tha se do t’i hapte rrugë prodhimit më të madh të rrymës, u paralajmërua se rryma do të shtrenjtohet. Kapadainjtë që qëndrojnë mbrapa këtyre veprimeve duhet gjetur e ndëshkuar. Një krim i ri nuk duhet lejuar.
Kryeministri, e jo ligji u mor edhe me ambalazhuesit e ujit në Kosovë, të cilët i kishin borxh shtetit rreth 70 milionë euro. Saktësisht 68 milionë.
Haradinaj vendosi t’ua falë borxhin atyre, në mënyrë arbitrare dhe të kundërligjshme. Ky është një sinjal i keq, ngase do të ndikojë te bizneset që të mos i paguajnë detyrimet ndaj shtetit, duke bërë që borxhet të grumbullohen. Nëse i janë falur borxhet një numri biznesesh, pse të mos u falen edhe të tjerave? Ndërkohë, institucionet publike do të përballen vazhdimisht me mungesë të të hyrave buxhetore.
Kapadaillëku i një grupi biznesmenësh u shpërblye. Të falësh borxhe të tilla nuk është heroizëm, por nënshtrim ndaj shkelësve të ligjit. Kjo don të thotë të shkelësh ligjin për t’i shpërblyer shkelësit e ligjit. Kjo don të thotë t’i amnistosh ata që nuk respektojnë ligjin.
* * *
Sinjal të keq për ligjin dhe drejtësinë të mërkurën tha edhe kryetari i Kuvendit dhe i PDK’së, Kadri Veseli. Ai ishte ftuar të dëshmojë në gjykimin kundër deputetevë të Lëvizjes Vetëvendosje, lidhur me hedhjen e gazit lotsjellës në parlament, por nuk iu kishte bindur tre herë ftesës së gjykatës. Prokurori u tërhoq nga dëshmia e tij, në vend që Veseli të detyrohet për t’u paraqitur në gjykatë. Vetëm mund të paramendohet se si do të kishte vepruar gjykata po që se në të njëjtën mënyrë do të silleshin zyrtarë të partivetë tjera, ta zëmë të Vetëvendosjes.
Nëse dikush insiston se në Kosovë nuk ka drejtësi selektive, rasti i Veselit tregon të kundërtën. Sjellja me kapadaillëk karshi organeve të drejtësisë është mesazhi më i keq i mundshëm për shtetin dhe shoqërinë. Është shfaqje e të fortëve që nuk njohin rend, që shkelin ligjin, ndërkohë që verbalisht bëjnë thirrje që ligji të respektohet. Është mesazh kundër të gjitha vlerave demokratike që një shoqëri dhe një shtet duhet t’i ndërtojë.
Të tjera
-
Vd*es profesori Binak Gërguri
Ka vdekur profesori Binak Gërguri, punonjësi shumëvjeçar i Institutit Pedagog...
-
NDODH DHE KJO/ Mjekët japonezë padisin Google Maps, ja arsyeja
Afër 60 mjekë në Japoni kanë ngritur padi, duke akuzuar Google Maps për injor...
-
Policia konfiskon dy armë zjarri në dy raste të ndryshme në Suharekë
Policia e Kosovës ka njoftuar për konfiskimin e dy armëve të zjarrit brenda 2...
-
Policia e Prishtinës vazhdon aktivitetet për largimin e personave që kërkojnë lëmoshë në rrugë
Policia e Prishtinës po i vazhdon aktivitetet për largimin e personave që kër...
-
Stano: Themelimi i Asociacionit çështje urgjente, moszbatimi i marrëveshjeve ka pasoja për të dyja palët
Sot janë bërë 11 vjet nga arritja e marrëveshjes së parë në mes të Kosovës dh...
-
Kurti ‘i dështojnë’ inspektimet, banorët protestojnë për zgjerimin e rrugës Kijevë-Dollc
Kryeministri i Kosovës, Albin Kurti ka inaguruar fillimin e punimeve për zgje...
-
Pamjet tmerrüese: Dënohet me 15 vite burg arsimtari që püthi nxënësen në Deçan
Me 15 vite burg e asnjëherë më kthim apo ligjërim në shkollë është dënuar, ar...
-
Propozim nga partia e Vuçiqit: Serbia t’i ndërpresë integrimet evropiane
Deputeti i Partisë Përparimtare Serbe (SNS) Vlladimir Gjukanoviq ka sugjeruar...
-
​Kurti ironizon me ushtrimet e ushtrisë serbe: Paraqesin ndotje të ajrit e tokës
Kryeministri i vendit, Albin Kurti, është deklaruar në lidhjet me ushtrimet u...
-
Kurti përmendi marrëveshjen Thaçi-Daçiq, reagon Çitaku: E di që po të mungon, duro dhe pak
Pasi kryeministri i vendit, Albin Kurti përkujtoi 11 vjetorin e arritjes së m...
-
15 filma në konkurrim për çmimet Tiantan në Festivalin e Filmit të Pekinit 2024
15 filma nga e gjithë bota, po konkurrojnë për çmimet Tiantan në Festivalin e...
-
Kurti: I ftoj qytetarët t’ia ndërpresin mandatin kryetarëve në veri, nëse mendojnë se nuk kanë qeverisur mirë
Kryeministri i vendit, Albin Kurti, ka folur për procesin e referendumit të 2...