Lajme

Stoltenberg nuk e konsideron problematike afërsinë e Erdoganit me Hamasin

Autori: Gazeta inFokus 12:38 | 10 November 2023

Sekretari i Përgjithshëm i NATO-s, Jens Stoltenberg nuk sheh problem për aleancën, në rastet kur presidenti turk, Recep Tayyip Erdogan shpreh mbështetje për grupin palestinez Hamas, – i shpallur organizatë terroriste nga SHBA-ja dhe BE-ja – i cili aktualisht është në luftë me Izraelin.

“Nuk është asnjëherë e lehtë kur kemi pikëpamje të ndryshme brenda aleancës”, ka thënë Stoltenberg, në një intervistë për agjencinë e lajmeve dpa.

Shefi i aleancës ka thënë se, megjithatë, “kjo nuk ndikon në ndonjë mënyrë në atë që bëjmë, sepse ne nuk jemi duke luajtur rol në atë konflikt specifik”.

-Advertisement-

Pas sulmeve brutale të Hamasit në komunitetet izraelite më 7 tetor, në të cilat janë vrarë mbi 1.400 njerëz, Erdogani e ka përshkruar Hamasin si “grup çlirimtar”.

Si rezultat i luftës në Gazë, Erdogan i ka shkëputur kontaktet me kryeministrin e Izraelit, Benjamin Netanyahu.

“Netanyahu nuk është më bashkëbisedues për ne në asnjë mënyrë. Ne e kemi fshirë atë, e kemi kryqëzuar”, ka thënë Erdogan.

Presidenti turk e ka përshkruar me raste Izraelin si “shtet terrorist” për shkak të trajtimit të palestinezëve dhe vazhdimisht e ka prezantuar veten si kampion të kauzës palestineze.

Deri më tani, liderët tjerë të NATO-s nuk janë dëgjuar duke e kritikuar Erdoganin.

Stoltenberg i ka hedhur poshtë spekulimet se heshtja e anëtarëve të NATO-s mund të lidhet me mbajtjen peng të anëtarësimit të Suedisë në aleancë, nga ana e Turqisë.

“Këto janë dy çështje të ndara”, ka thënë ai.

Turqia dhe Hungaria janë dy vendet e vetme që ende nuk e kanë ratifikuar marrëveshjen për anëtarësim të Suedisë në NATO.

Turqia ankohet se Suedia nuk ka bërë mjaftueshëm për luftim të atyre që i quan militantë kurdë, një organizatë të të cilëve Ankaraja e konsideron terroriste./ rel

Subscribe në YouTube: GAZETA INFOKUSI
Etiketa:
E PREMTJA E BARDHË NË ETC ME ZBRITJE DERI 50%
-Advertisement-

Të tjera

Fokusi

lajme