Paneli i Trupit Gjykues në Hagë, i cili më 16 shtator dënoi Hashim Thaçin, Kadri Veselin, Rexhep Selimin dhe Jakup Krasniqin me gjithsej 81 vjet burgim, ka vendosur që çështjen e dëmshpërblimit të viktimave pjesëmarrëse ta trajtojë vetë, në vend që ato t’i referojë për procedurë civile në gjykatat e Kosovës.

Trupi Gjykues, i kryesuar nga gjyqtari Charles Smith, ka vendosur të zhvillojë procedurën e reparacioneve dhe, pas shqyrtimit të kërkesave, të nxjerrë vetë urdhrin përkatës për dëmshpërblim.

Në argumentet e paraqitura para Panelit, Mbrojtësi i Viktimave kishte ngritur një sërë shqetësimesh lidhur me funksionimin e sistemit të drejtësisë civile në Kosovë.

-Advertisement-

Mes tyre përmenden kohëzgjatja e procedurave gjyqësore, pretendimet për një nivel të caktuar korrupsioni dhe ndërhyrjesh në sistemin juridik, mungesa e burimeve të mjaftueshme për ndihmë juridike, si dhe çështjet që lidhen me afatet e parashkrimit.

Mbrojtësi i Viktimave ka argumentuar gjithashtu se për disa nga viktimat pjesëmarrëse do të ishte shumë e vështirë që kompensimin ta kërkonin përmes procedurave civile në Kosovë.

Një tjetër çështje e ngritur lidhet me mbrojtjen e identitetit të viktimave. Sipas argumenteve të paraqitura, procedurat para gjykatave në Kosovë nuk do të garantonin domosdoshmërisht të njëjtin nivel të masave mbrojtëse dhe anonimitetit që viktimat kanë pasur gjatë procesit para Dhomave të Specializuara.

Pas këtyre argumenteve, Paneli vendosi që procedura për dëmshpërblim të zhvillohet në Hagë.

Në vendim është përcaktuar gjithashtu që ekipet e mbrojtjes të paraqisnin kundërshtimet eventuale lidhur me këtë çështje deri më 22 shtator 2026.

Ndërkohë, Mbrojtësi i Viktimave është urdhëruar që kërkesën për dëmshpërblim ta dorëzojë deri më 14 tetor 2026.

Dhomat e Specializuara kanë nxjerrë edhe më herët urdhra për dëmshpërblimin e viktimave. Në rastin e Salih Mustafës ishte përcaktuar një shumë prej 207 mijë eurosh, ndërsa në rastin e Pjetër Shalës ishte caktuar dëmshpërblim prej 208 mijë eurosh.

Çështja e reparacioneve në rastin e Shalës ka kaluar edhe në procedura para Dhomës së Specializuar të Gjykatës Kushtetuese.

Në çështjen KSC-BC-2020-06 ndaj Thaçit, Veselit, Selimit dhe Krasniqit janë gjithsej 156 viktima pjesëmarrëse në procedurë.

Udhëto Oslo – Prishtinë çdo javë me PrishtinaTickets

Sponsoruar

-Advertisement-