Shëndetësi

Si ndikojnë valët e të nxehtit tek fëmijët?

Autori: Gazeta inFokus 15:24 | 28 July 2023

Fondi i Kombeve të Bashkuara për Fëmijët (UNICEF) ka publikuar një raport për mbrojtjen e fëmijëve nga valët e të nxehtit në Evropë dhe në Azinë Qendrore.

Në raport flitet në detaje për ndikimin e valëve të të nxehtit te fëmijët; sëmundjet që mund t’i prekin ata; si dhe për parandalimin e tyre.

“Sëmundjet e lidhura me nxehtësinë ndodhin kur ekspozimi ndaj temperaturave të larta dhe lagështisë, e cila mund të intensifikohet nga sforcimi fizik, mbizotëron aftësinë e trupit për të ftohur veten. Rastet variojnë nga të lehta, si skuqjet e të nxehtit tek foshnjat, deri te pasojat më serioze, kërcënuese për jetën si goditja nga nxehtësia, të diagnostikuara pasi temperatura e trupit të rritet mbi 40 gradë Celsius, me një rrezik të lartë të dështimit të organeve”, thotë ndër të tjera ky raport i UNICEF-it.

-Advertisement-

Raporti thotë se parandalimi është çelësi, ndërsa thekson se krijimi i vendeve më të freskëta për foshnjat dhe fëmijët, pirja e bollshme e ujit, shmangia e ambienteve të jashtme gjatë orëve të nxehta të mesditës dhe pasdites dhe ngadalësimi kur përshtateni me ushtrimet, janë mënyrat më efektive për të shmangur sëmundjet e lidhura me nxehtësinë.

“Fëmijët janë në mënyrë unike të cenueshëm ndaj valëve të të nxehtit pasi trupave të tyre u duhet më shumë kohë për të rritur prodhimin e djersës. Ata kanë nevojë për më shumë kohë për t’u ambientuar në një mjedis të ngrohtë sesa të rriturit. Fëmijët e vegjël janë gjithashtu më të ndjeshëm ndaj dehidrimit sepse një përqindje më e madhe e peshës së tyre trupore është ujë”, theksohet më tej në këtë raport.

Foshnjat dhe fëmijët më të vegjël, thotë raporti i UNICEF-it, kanë vështirësi në rregullimin e temperaturës së trupit të tyre.

“Studimet kanë treguar se fëmijët e vegjël që kaluan 30 minuta në një dhomë 35 gradë Celsius panë që temperaturat e tyre bazë të rriteshin dukshëm më lartë dhe më shpejt se të nënave të tyre – edhe pse djersitnin më shumë se të rriturit në krahasim me madhësinë e tyre. Mjekët pediatër këshillojnë kujdestarët të monitorojnë se sa ujë konsumojnë fëmijët dhe t’i inkurajojnë ata të pinë para se ta kërkojnë atë. Etja tregon se trupi tashmë është i dehidratuar”, u tha në “Luftimi i të nxehtit” nga UNICEF-i.