Ekonomi

Si ishte me tatime kazinoja ku u krye vrasja në Lipjan?

Autori: Sylejman Sylejmani 14:58 | 24 March 2019

Të mërkurën në kazinonë MATRIX në Lipjan, u krye një vrasje.

Një punëtor i kësaj kazinoje mbeti i vrarë nga arma e zjarrit, shkruan Gazeta inFokus.

Kjo ishte vrasja e dytë në kazinotë kosovare brenda pak kohe. Një vrasje më herët ishte kryer në Suharekë.

-Advertisement-

Gazeta inFokus ka kërkuar të dhëna se sa ka qenë e rregullt kazinoja MATRIX që operon në qytetin e Lipjanit me tatimet që duhet paguar në Administratën Tatimore të Kosovës.

Zëdhënësja e ATK-së, Valentina Bytyqi – Sefa ka treguar se kjo kazino ka qenë e rregullt me pagesat e tatimeve dhe të akcizës.

Ajo thotë se asnjë gjobë për parregullsi nuk është shqiptuar për këtë kazino gjatë vitit 2018 dhe vitit 2019.

Rasti i Lipjanit ka bërë që Kuvendi i Kosovës të mbajë seancë të jashtëzakonshme për mbylljen e kazinove dhe lojërave të fatit.

Në këtë seancë, ministri i Financave, Bedri Hamza ka deklaruar se në Kosovë nuk ka asnjë kazino të licencuar.

Megjithatë, këtë gjë e hedh poshtë Bytyqi – Sefa në përgjigjet e saj dërguar Gazetës inFokus.

Ajo ka thënë se pikërisht kazinoja MATRIX në Lipjan ku edhe u krye vrasja, ishte e licencuar.

“Po janë bërë vizita në vitin 2017 kur është licencuar ky lokal, si dhe në vitin 2018 është vizituar, qëllimi i vizitave ka qenë marrja e librave dhe regjistrimeve, si dhe gjendja IN dhe OUT”, ka deklaruar ajo.

Në Kuvend ka kaluar rezoluta e cila do t’ua ndalojë aktivitetin subjekteve të lojërave të fatit për 10 vjet.

Në një afat prej 30 ditësh Qeveria duhet ta dërgojë në Kuvend ligjin e plotësuar që ndalon në këtë periudhë aktivitetin e tyre.

Rezoluta kaloi me 74 vota për, e asnjë kundër. /Gazeta inFokus

Subscribe në YouTube: GAZETA INFOKUSI