Rusia u ka thënë vendeve të huaja “jomiqësore” se duhet të fillojnë t’i bëjnë pagesat për gazin në monedhën rubla, ose përndryshe ajo do të ndërpresë furnizimet.

Vladimir Putin ka nënshkruar një dekret ku thuhet se blerësit “duhet të hapin llogari në rubla në bankat ruse”, duke filluar nga dita e premte.

“Askush nuk na shet neve ndonjë gjë falas, kështu që as ne nuk do të bëjmë bamirësi – domethënë, kontratat ekzistuese do të ndërpriten,” tha presidenti rus.

Kërkesa e Putinit po konsiderohet si një përpjekje për të rritur rublën, e cila është goditur nga sanksionet e Perëndimit.

Kompanitë dhe qeveritë perëndimore kanë refuzuar kërkesat e Rusisë për të paguar gazin në rubla, duke e cilësuar këtë si një shkelje të kontratave ekzistuese, të cilat janë nënshkruar për monedhat euro ose dollarë amerikanë.

Që kur Rusia pushtoi Ukrainën, vendet perëndimore kanë vendosur sanksione ekonomike dhe tregtare ndaj Rusisë, por Bashkimi Europian nuk ka aplikuar kufizime për naftën ose gazin, ndryshe nga SHBA-ja dhe Kanadaja, pasi vendet anëtare të BE-së mbështeten shumë te furnizimet nga Rusia.

BE-ja merr rreth 40% të gazit dhe 30% të naftës së saj nga Rusia dhe nuk ka ndonjë zëvendësues për këto produkte nëse ndërpriten furnizimet. Ndërkohë, Rusia aktualisht fiton 400 milionë euro në ditë nga shitja e gazit në BE dhe nuk ka asnjë mënyrë për ta orientuar këtë furnizim drejt tregjeve të tjera.

Putin tha se kalimi në rubla kishte për qëllim forcimin e sovranitetit të Rusisë. Ai deklaroi se Rusia do t’i përmbahej detyrimeve të saj kontraktuale, nëse vendet perëndimore binden për të paguar në rubla.

Gjermania tha se ndryshimi i shpallur nga Putin përbënte një “shantazh”.

Në një konferencë shtypi, ministri gjerman i ekonomisë Robert Habeck tha se nuk e kishte parë ende dekretin e ri të nënshkruar nga zoti Putin.

“Për sa i përket kërcënimit, kërkesës apo konsideratës – nuk di si ta quajmë më – që duhet të paguajmë në rubla, është thelbësore për ne që të respektohen kontratat”, tha ai.

Nga ana tjetër, kancelari gjerman Olaf Scholz tha se kompanitë gjermane do të vazhdojnë të paguajnë për gazin rus duke përdorur monedhën euro, siç përcaktohet në kontrata.

Urdhri i nënshkruar nga Putin i detyron blerësit e huaj të gazit rus që të hapin një llogari në Gazprombank dhe të transferojnë euro ose dollarë amerikanë në të.

Gazprombank do t’i konvertojë këto shuma në rubla, të cilat më pas do të përdoren për të bërë pagesën për gazin.

Ministri i ekonomisë i Francës, Bruno Le Maire, nuk pranoi të komentojë për detajet teknike që lidhen me kërkesat e fundit të Rusisë për pagesën e gazit në rubla.

Analistët thonë se detyrimi i vendeve të tjera që të paguajnë në rubla për gazin do të forcojë monedhën e vendit, e cila ra ndjeshëm pas pushtimit, por që tashmë ka filluar të rimëkëmbet.

Nathan Piper, kreu i kërkimeve për naftën dhe gazin në Investec, tha se Putin po përpiqej “t’i kthente” Europës presionin ekonomik dhe se rritja e kërkesave për këmbim valutor në rubla ka të ngjarë të rrisë vlerën e monedhës.

“Sidoqoftë, Rusia në afatgjatë duhet të mbetet një furnizues i besueshëm i gazit, kështu që është e paqartë nëse ata do të kufizojnë realisht furnizimet me gaz,” shtoi ai.

“Thënë kjo, edhe vetëm rreziku që kjo të ndodhë po i mban çmimet e gazit në Mbretërinë e Bashkuar dhe në Europë në nivele rekord, gjashtë herë më të larta se mesatarja 10-vjeçare. Kjo përkthehet në rritje marramendëse te faturat e energjisë për konsumatorët”.

Prince Caffe dhuron veturën “Kia Sportage” (VIDEO)

Sponsoruar