Asociacionit të Komunave të Kosovës, ka kërkuar nga qeveria që të procedohet urgjentisht me vendimmarrjen në Komisionin e Granteve dhe që Qarkorja e Parë Buxhetore të dërgohet tek komunat brenda afateve të përcaktuara me ligj.

Nga AKK është thënë se komunat rrezikojnë të përballen me vështirësi serioze në procesin e hartimit dhe zhvillimit të rregullt të buxhetit për vitin 2026.

‘‘Vonesa në këtë fazë rrezikon të çrregullojë të gjithë ciklin buxhetor, të cenojë transparencën dhe të kufizojë përfshirjen e qytetarëve në planifikim’’, thuhet mes tjerash nga AKK.

Komunikata:

A po rrezikohen Komunat pa planifikim të rregullt buxhetor për vitin 2026 – Korniza Afatmesme e Shpenzimeve 2026-2028 ende e paaprovuar

Komunat, përmes Asociacionit të Komunave të Kosovës, kërkojnë nga niveli qendror që të procedohet urgjentisht me vendimmarrjen në Komisionin e Granteve dhe që Qarkorja e Parë Buxhetore të dërgohet tek komunat brenda afateve të përcaktuara me ligj. Komunat e Republikës së Kosovës rrezikojnë të përballen me vështirësi serioze në procesin e hartimit dhe zhvillimit të rregullt të buxhetit për vitin 2026, për shkak se Korniza Afatmesme e Shpenzimeve (KASH) për periudhën 2026–2028 ende nuk është miratuar, ndonëse afati ligjor për miratimin e saj ka qenë 30 prill 2025.

Sipas Ministrit të Financave, një ndër arsyet e vonesës është mungesa e anëtarit të Komisionit të Granteve, konkretisht, kryetarit të Komisionit Parlamentar për Buxhet dhe Financa për shkak të moskonstituimit të Kuvendit të Republikës së Kosovës. Mirëpo, sipas drejtorit ekzekutiv të AKK-së, ky arsyetim nuk qëndron, pasi Komisioni i Granteve përbëhet nga 9 anëtarë dhe mungesa e njërit prej tyre nuk e pengon funksionimin e komisionit, e as nuk e justifikon bllokimin e miratimit të KASH-it.

Gjithashtu, me Ligjin për Menaxhimin e Financave Publike dhe Përgjegjësitë, KASH i dërgohet Kuvendit vetëm për informim dhe nuk kërkohet ndonjë vendimmarrje nga ana e tij. Kjo nënkupton që procesi mund dhe duhet të vazhdojë pavarësisht situatës në Kuvend.

Mosmiratimi i KASH-it pamundëson zhvillimin e rregullt të procesit buxhetor në nivel lokal, duke ndikuar në përgatitjen e Qarkores së Parë Buxhetore, dokument kyç që i udhëzon komunat për të nisur hartimin e buxhetit për vitin pasues. Kjo qarkore duhet t’u dërgohet komunave deri më 15 maj 2025. Vonesa në këtë fazë rrezikon të çrregullojë të gjithë ciklin buxhetor, të cenojë transparencën dhe të kufizojë përfshirjen e qytetarëve në planifikim.

Duke marrë parasysh se viti 2025 është gjithashtu vit zgjedhor në nivel komunal, është jetike që institucionet qendrore të veprojnë pa vonesë.

Viva Fresh sjell programin XL: 10% zbritje gjatë gjithë vitit!

Sponsoruar