Vendimet që “penguan riintegrimin e personelit gjyqësor serb” thuhet se shqetësojnë Komisionin.

Raporti evidenton 35 raste sulmesh ose kërcënimesh ndaj gazetarëve, ndonëse më pak se vitin paraprak.

Zyrtarë të lartë, përfshirë kryeministrin Albin Kurti, kritikohen për gjuhë të ashpër ndaj mediave.

Gazetarët hasin pengesa për dokumente publike.

Ligjet për RTK-në dhe Komisionin e Pavarur të Mediave mungojnë. Katër vende në bordin e RTK-së mbeten bosh.

Pronësia dhe financimi i mediave mbeten jotransparentë, duke i ekspozuar mediat e pavarura ndaj presionit financiar e politik, po ashtu pohon raporti

Rritja ekonomike zbriti nga 4,6 për qind më 2024 në 3,6 për qind më 2025.

Inflacioni arriti 7,3 për qind në gusht 2026.

Zgjerimi i buxhetit rrezikon ta shtojë presionin mbi çmimet.

Rritjet parazgjedhore të pagave dhe shpenzimeve sociale ngarkojnë buxhetin.

Menaxhimi i investimeve publike nuk përparoi.

Portali i transparencës mbetet jofunksional.

Për investimet kapitale mungojnë të dhënat e qarta mbi përzgjedhjen dhe ndikimin.

Në tre tremujorët e parë të vitit 2025, vetëm rreth 27 për qind e grave ishin të punësuara.

Rreth 33,4 për qind e të rinjve 15–29 vjeç nuk punonin, nuk studionin dhe nuk trajnoheshin: niveli më i lartë rajonal.

“Zbatimi i reformave në sektorin e shëndetësisë ka ngecur,” konstaton Komisioni.

Qytetarët paguajnë vetë rreth 40 për qind të shpenzimeve shëndetësore.

Mungojnë dosjet elektronike; disa barna thelbësore nuk sigurohen rregullisht.

Kontrollet për kancerin nuk kryhen sistematikisht.

As plani për kontrollin e kancerit të qafës së mitrës nuk ka nisur.

Në PISA 2025, Kosova ishte ndër pjesëmarrëset me rezultatet më të dobëta.

Mungojnë ligjet për arsimin profesional dhe tekstet shkollore.

Në shkencë nuk pati përparim.

Më 2024, shpenzimet kërkimore ishin 0,1 për qind e PBB-së, përkundrejt mesatares 2,2 për qind në BE.

Energjia mbetet pengesë ekonomike: mbi 90 për qind e energjisë elektrike prodhohet nga dy termocentrale të vjetruara dhe ndotëse.

Ankandet për burime të ripërtëritshme vonohen, plani energjetik dhe klimatik mungon, ndërsa hekurudhat përparojnë ngadalë.

Rreth 40 për qind e pyjeve publike shfrytëzohen pa kontroll ose ilegalisht.

Mbetjet industriale të rrezikshme dhe shkarkimet në lumenj kërcënojnë tokën, ujin dhe shëndetin, ndërsa masat kundër ndotjes vazhdojnë të vonohen.

Programi i zhvillimit rural nuk u zbatua më 2025.

Humbja e tokës bujqësore kërkon ndërhyrje urgjente.

Siguria ushqimore nuk përparoi.

Agjencia e Ushqimit dhe Veterinarisë ka mungesa personeli dhe fondesh.

Administrimi i fondeve evropiane ka boshllëqe në menaxhim, auditim dhe parandalimin e mashtrimit.

“Kosova ndërmori vazhdimisht veprime në kundërshtim me detyrimet e saj nga dialogu, ose veprime që dëmtonin procesin e normalizimit,” shkruan raporti.

Përmenden mosrealizimi i Asociacionit dhe pengesat në riintegrimin e serbëve në institucione, krahas detyrimeve të pazbatuara nga Serbia.

Serbia kritikohet për pengimin e Kosovës në organizata ndërkombëtare dhe mungesën e hapave për të siguruar përgjegjësi për sulmin në Banjskë.

Për Marrëveshjen e Ohrit, asnjëra palë nuk ka përparuar mjaftueshëm, megjithëse pati hapa për personat e zhdukur.

Raporti njeh përparim kundër krimit të organizuar, bashkëpunimin me Europolin dhe përafrimin e plotë me politikën e jashtme të BE-së.

Pas kalimit paqësor të pushtetit lokal në veri, Komisioni hoqi masat ndaj Kosovës dhe rifilloi ndihmën financiare.

Për vitin e ardhshëm, Komisioni kërkon miratimin e ligjeve të mbetura pezull, institucione funksionale dhe zbatimin e reformave.