Lajme

Për targat, pas së hënës s’erdhi e marta siç tha Bislimi – por e mërkura

Autori: Gazeta inFokus 09:46 | 24 November 2022

Mbrëmë është arritur marrëveshja në mes të Kosovës dhe Serbisë për çështjen e targave, lajm të cilin e bëri të ditur kryediplomati evropian, Josep Borrell.

“Shumë i lumtur për të njoftuar se shefat e grupeve negociatore të Kosovës dhe Serbisë, nën ndërmjetësimin e BE-së janë pajtuar mbi masat për të shmangur eskalimin e mëtejmë dhe që të koncentrohen plotësimin në propozimet për normalizim të marrëdhënieve mes tyre”, është shprehur Borrell.

Pas arritjes së kësaj ujdie, ka reaguar edhe zëvendëskryeministri i Kosovës, Besnik Bislimi, duke thënë se bisedimet duhet të vazhdojnë për normalizimin e plotë të marrëdhënieve.

-Advertisement-

“Pas marrëveshjes së sotme, ne duhet të vazhdojmë bisedimet tona intensive për propozimin e BE-së, të mbështetur nga Gjermania dhe Franca, për normalizim të plotë të marrëdhënieve”, tha ai.

E derisa ende nuk pati dakordim mes Kosovës dhe Serbisë për çështjen e targave, të hënën e 21 nëntorit pritej që të hynte në fuqi masa e gjobitjes për veturat me targa ilegale.

Rreth këtij afati për aplikim të gjobave nga data 21 nëntor, zëvendëskryeministri Besnik Bislimi, të mërkurën e 16 nëntorit ishte pyetur nga gazetarët se çka pritej të ndodhte pas kësaj të hëne, ai ishte përgjigjur me ironi duke thënë “vjen e marta pas së hënës”.

“Nuk jam Nostradamus, jam zëvendëskryeministër. Nuk e di çka do te ndodh të hënën, jemi duke diskutuar”, ishte shprehur Bislimi.

Subscribe në YouTube: GAZETA INFOKUSI