Lajme

Osmani, Stoltenbergut: Sulmet ndaj ushtarëve të KFOR-it u kryen nga krimi i organizuar serb

Autori: Gazeta inFokus 15:16 | 07 September 2023

Presidentja e vendit, Vjosa Osmani, gjatë konferencës që pati me Sekretarin e Përgjithshëm të NATO-s, Jens Stoltenberg, ka përmendur plagosjen e mbi 90 ushtarëve të KFOR-it në veri të vendit.

Osmani tha se sulmet ndaj ushtarëve të KFOR-it në Kosovë janë planifikuar, organizuar e ekzekutuar nga krimi i organizuar serb, siç, sipas saj, është vërtetuar në pamje.

“Sekretar, nëse ka pandëshkueshmëri për sulmet e 29 majit ndaj ushtarëve të KFOF-it dhe policëve të Kosovës e gazetarëve, ka mundësi që kryerësit ta kuptojnë këtë si dobësi tonën dhe do të trimërohen për ta përsëritur atë akt dhune”.

-Advertisement-

“Ata që kanë urdhëruar atë sulm janë shumë qartë të njohur dhe për këtë si presidente e Kosovës i ofrojmë NATO-s bashkëpunim të plotë që t’i sjellim kryerësit e atyre sulmeve para drejtësisë. Duhet të ketë llogaridhënie të thellë e të plotë për këto grupe të krimeve të organizuara”, tha Osmani.

Tutje, ajo përmendi edhe dorëheqjet e policëve serbë, duke thënë se presionet e Serbisë duhet të ndalen.

Kurse, në lidhje me sulmin ndaj ushtarëve të KFOR-it, Stoltenberg tha se përgjegjësit për vepra të tilla duhet të dalin para drejtësisë.

“Sulmi ndaj paqeruajtësve të NATO-s që ka ndodhur në maj të këtij viti është i papranueshëm dhe është e rëndësishme që ata që janë përgjegjës për vepra të tilla të mbahen përgjegjës. Ata që janë përgjegjës duhet të mbahen para drejtësisë”, tha Stoltenberg.

Subscribe në YouTube: GAZETA INFOKUSI