Ish-presidentja e Kosovës, Vjosa Osmani, ka bërë të ditur se ka marrë pjesë në një përvjetor historik në Vjenë, një shekull pas Kongresit të parë Panevropian.

Osmani, e cila është fituese e Çmimit Evropian Coudenhove-Kalergi për vitin 2024, tha se në këtë ngjarje është bashkuar me liderë, diplomatë dhe përfaqësues të shoqërisë civile nga vende të ndryshme të Evropës, për të diskutuar temën “Një Evropë e fortë!”.

Në një postim të saj, Osmani theksoi se një Evropë e fortë, sipas saj, është ajo që përballet me sfidat dhe qëndron pas vlerave të saj.

-Advertisement-

“Që mbron demokracinë, lirinë dhe të vërtetën, duke mos lejuar që historia të shtrembërohet në kurriz të viktimave”, shkroi Osmani.

Duke iu referuar Kosovës, ajo tha se rruga drejt Evropës është pjesë e identitetit dhe aspiratës së vendit për një të ardhme të bazuar në liri, demokraci dhe paqe.

Osmani kujtoi gjithashtu se rreth dy dekada më parë, Çmimi Evropian Coudenhove-Kalergi iu nda edhe ish-presidentit të Kosovës, Ibrahim Rugova.

“Një shekull pas vizionit të parë për një Evropë të bashkuar, detyra jonë është ta bëjmë këtë vizion më të fortë, më të drejtë dhe më të vendosur për të mbrojtur vlerat mbi të cilat është ndërtuar”, përfundoi ajo.

Postimi i saj i plotë:

Në Vjenë, pata nderin të flas në një përvjetor historik, një shekull pas Kongresit të parë Panevropian.

Si fituese e Çmimit Evropian Coudenhove-Kalergi për vitin 2024, çmim që rreth 20 vite më parë iu nda edhe Presidentit Rugova, u bashkova me liderë, diplomatë e përfaqësues të shoqërisë civile nga mbarë Evropa për të diskutuar temën “Një Evropë e fortë!”.

Sot, një Evropë e fortë është një Evropë që nuk tërhiqet përballë sfidave dhe nuk heq dorë nga vlerat e saj. Që mbron demokracinë, lirinë dhe të vërtetën, duke mos lejuar që historia të shtrembërohet në kurriz të viktimave.

Për Kosovën, rruga evropiane është pjesë e identitetit dhe e aspiratës sonë për një të ardhme ku liria, demokracia dhe paqja janë të pakthyeshme.

Një shekull pas vizionit të parë për një Evropë të bashkuar, detyra jonë është ta bëjmë këtë vizion më të fortë, më të drejtë dhe më të vendosur për të mbrojtur vlerat mbi të cilat është ndërtuar.

Udhëto Oslo – Prishtinë çdo javë me PrishtinaTickets

Sponsoruar

-Advertisement-