Pothuajse të gjithë në Evropë jetojnë në qytete të ndotura, ku nivelet mesatare vjetore të grimcave të imëta janë më të larta se kufiri i rekomanduar nga Organizata Botërore e Shëndetësisë (OBSH).

Kjo praktikisht do të thotë se pothuajse të gjithë në kontinent po thithin ajër të keq që ka rezultuar të jetë vdekjeprurës. Ndotja e ajrit rrit rrezikun e sëmundjeve të frymëmarrjes dhe zemrës dhe ul jetëgjatësinë.

“Me nivelet aktuale të ndotjes së ajrit, shumë njerëz po sëmuren. Ne e dimë se ulja e niveleve të ndotjes së ajrit i zvogëlon këtë shifra”, tha Marc Nieuwenhuizen, drejtor i Institutit të Barcelonës për Shëndetin Global (ISGlobal).

Rrjeti Evropian i të Dhënave të Gazetarisë dhe Deutsche Welle analizuan të dhënat satelitore nga Shërbimi i Monitorimit të Atmosferës Copernicus (CAMS) dhe zbuluan se në vitin 2022, pothuajse të gjithë në Evropë, 98% e njerëzve, jetonin në zona ku përqendrimi i grimcave të imëta, të cilat zakonisht njihen si PM 2.5, ishte mbi kufirin e vendosur nga OBSH.

OBSH rekomandon që përqendrimi mesatar vjetor i ndotjes së grimcave nuk duhet të kalojë 5 mikrogramë për metër kub ajër.

Nivelet e ndotjes ndryshojnë nga rajoni në rajon në Evropë. Mund të jetë veçanërisht e rëndë në pjesë të Evropës Qendrore, në Luginën e Po në Itali dhe zona më të mëdha metropolitane si Athina, Barcelona dhe Parisi.

Analiza tregon se zonat më të ndotura të Evropës arrijnë përqendrime mesatare vjetore të PM 2.5 prej rreth 25 mikrogramë për metër kub.

Nivele të larta të ndotjes së ajrit janë raportuar për qytete të veçanta evropiane, por kjo analizë e re e të dhënave ofron një krahasim të parë pan-evropian të ndotjes në rajone të ndryshme.

Cilësia e ajrit në Evropë është përgjithësisht më e mirë se në pjesët e tjera të botës.

Në qytetet veriore të Indisë si Nju Delhi, Varanasi dhe Agra, për shembull, vlerat mesatare të PM 2.5 mund të jenë deri në 100 mikrogramë për metër kub. Në Evropë, të dhënat tregojnë nivele të ndotjes deri në 25 mikrogramë për metër kub.

Por edhe në nivelet relativisht më të ulëta të Evropës, ndotja mund të ketë një ndikim të rëndësishëm në shëndetin e njerëzve.

Pothuajse e gjithë Evropa është në të verdhë dhe portokalli në hartën e Kopernikut, duke treguar zonat e kontaminuara. Shumë qytete të mëdha janë me ngjyrë të kuqe, që tregon më shumë se katër herë përmbajtjen e grimcave të imta në ajër, ndërsa vetëm zonat me ngjyrë blu kanë cilësi të tolerueshme të ajrit.

FREE FRIDAY ME ZBRITJE DERI 70%

Sponsoruar