Nagavci: Qeveria është e gatshme të negociojë Kontratën e re kolektive
Autori: Gazeta inFokus 20:58 | 03 January 2023
Ministrja e Arsimit, Arbërie Nagavci ka folur edhe për sfidat e ministrisë që drejton, pasi shumë shkolla kanë refuzuar të kompensojnë orët e humbura gjatë grevës së vitit të kaluar, si dhe për kontratën kolektive, e cila tashmë është shfuqizuar.
“Një nga sfidat në sistemin e arsimit mbetet implementimi i suksesshëm i politikave të cilat janë në kompetencë të Ministrisë së Arsimit. Duke pasur parasysh se sipas Ligjit mbi Arsimin në Komuna është në kompetencë të komunave që të bëjnë mbikëqyrjen dhe të sigurohen që proceset të shkojnë mbarë. Për fat të keq, për shkak edhe të arsyeve politike, jo rrallëherë ka pasur sfida në implementim të legjislacionit”, është shprehur ajo.
Megjithatë, Nagavci ka thënë se vitin e fundit kanë bërë punë shumë të mirë sa i përket plotësimit të infrastrukturës ligjore.
”Janë katër ligje të finalizuara, shumë prej të cilave kanë filluar me dekada më herët dhe nuk kanë arritur të finalizohen dhe një varg i udhëzimeve administrative, por tani duhet të bëhet implementimi i tyre në praktikë. Në këtë linjë, si ministri e Arsimit jemi në finalizim të punësimit të 20 inspektorëve dhe shumë shpejt do të hapet konkursi për së paku 20 të tjerë”, ka thënë ministrja.
Sipas saj me këto mekanizma do të sigurohen që në bashkëpunim me partnerët e tjerë të arrijnë që secili të kryejë punën e vet sipas kompetencave dhe përgjegjësive që i ka, përfshirë këtu edhe mbajtjen e mësimit të rregullt ose sigurimin që çdo orë e mësimit të mbahet sipas planifikimit, e jo, siç ka thënë, me shumë lehtësi të merren vendime në nivel të shkollave, qoftë për shkurtim të orëve mësimore apo në rastin më të keq marrja e vendimit për moskompensim të orëve të humbura.
“Në krahasim me shtatorin gjendjen e kemi më të mirë, por është shqetësuese të shihet që me lehtësi merren vendime të tilla”, ka shtuar Nagavci.
Ministrja ka folur edhe për shkëputjen e kontratës kolektive, teksa ka thënë se ekzekutivi është duke punuar që të ketë kontratë kolektive të përgjithshme dhe jo sektoriale.
“Ne kemi dërguar informatën zyrtare te SBASHK-u, por këtë çështje e kemi diskutuar që nga marrja e mandatit sepse kontrata e tillë as nuk mund të konsiderohet valide. Asnjëherë nuk ka qenë e lidhur duke i respektuar kriteret ligjore. Nëse e shihni preambulën e kontratës ajo iu referohet neneve joekzistuese apo ligjeve të shfuqizuara, gjë që nuk e bën valide atë kontratë. Ne, bashkë me informatën zyrtare për këtë çështje, e kemi dërguar edhe ftesën në SBASHK për filluar diskutimet për kontratën e re kolektive dhe këtë e ka përmendur edhe vet kryeministri Kurti, duke thënë se qëllimi dhe orientimi ynë si qeveri është që të kemi kontratë të përgjithshme kolektive e jo vetëm kontrata sektoriale siç ishte në këtë rast kontrata e nënshkruar në kohë të fushatës zgjedhore nga ministri i një subjekti politik”, ka thënë ajo.
Nagavci ka thënë se vullneti dhe gatishmëria e Qeverisë ekziston, por sipas saj SBASHK-u nuk është i interesuar të negociojë kontratë të re.
“Sidoqoftë, besoj se do të reflektojnë sërish dhe do të shohin se është gabim edhe ky qëndrim i tyre”, ka nënvizuar ministrja.
Nagavci: Vlera e koeficientit caktohet së shpejti në Qeveri
Ministrja e Arsimit, Arbërie Nagavci ka thënë vlera e koeficientit bazë për mësimdhënësit do të përcaktohet shumë shpejt nga Qeveria.
Ligji për Pagat është miratuar kohë më parë, por deri më tash ende nuk është bërë i ditur koeficienti bazë. SBASHK-u ka deklaruar se nëse koeficienti nuk është mbi 120 euro, do ta kundërshtojë atë.
Megjithatë, ministrja ka thënë se nuk është në kompetencat e saj të përcaktojë këtë koeficient, teksa sipas saj sfidë mbetet ngritja e cilësisë së arsimit në vend.
“Vlera e koeficientit do të përcaktohet shumë shpejt në Qeveri. Nuk është në kompetencat e mia të plota të flasë për këtë, por besoj se koeficientit do të reflektojë edhe rritjen ekonomike. Sektori i arsimit është përfitues i të gjitha ndryshimeve dhe koeficienteve që janë planifikuar në Ligjin e Pagave. Por sfida mbetet ngritja e cilësisë në arsim e jo vetëm koeficientët”, ka deklaruar Nagavci në një intervistë në Lajmet e orës 19:30 në RTK.
Sa i përket grevave në arsim, ajo ka thënë se është mirë që SBASHK-u përfundimisht ka reflektuar dhe e ka deklaruar të mbyllur grevën dhe se tani duhet marrë mësim nga ajo periudhë e humbur.
“Besoj se diskutimet për greva pas gjithë atij mësimi të humbur në vitin e kaluar duhet të jenë të tejkaluara dhe duhet të diskutohet vetëm për mësimet që i kemi marrë dhe për punën që duhet bërë për të kompensuar për aq sa është e mundur humbjet e nxënësve”, ka shtuar ministrja./rtk
Të tjera
-
Dënohen dhe dëbohen dy rusët e ndaluar në veri të Kosovës
Dy shtetasit rusë, që janë ndaluar ditë më parë nga autoritetet e Kosovës për...
-
Policia gjatë një bastisje në Leposaviq gjenë narkotik, ar*më zjarri dhe municion
Drejtoria për Hetimin e Trafikimit me Narkotik gjatë një bastisje në Mitrovic...
-
Ahmetaj: Kurti e ka sjellë vendin në një situatë pa krye
Nënkryetarja e PDK-së, Mimoza Ahmetaj, tha se kryeministri Albin Kurti e ka s...
-
Haradinaj në Prizren, viziton fabrikën që eksporton jashtë vendit: Ky është shembull suksesi i krijuar me djersë, e Kryeministri kënaqet me “Petët e Atiqit”
Kryetari i Aleancës për Ardhmërinë e Kosovës (AAK), Ramush Haradinaj, ka vizi...
-
Nis takimi mes Kurtit dhe Krasniqit
Albin Kurti dhe Memli Krasniqi kanë nisur takimin dy palësh. Kreu i PDK’së...
-
Haziri: Pas 16 majit, Kosova politikisht nuk do të jetë më e njëjtë
Nënkryetari i LDK-së, Lutfi Haziri, ka thënë se “Kosova politikisht nuk është...
-
LAJMI I FUNDIT: Tërmet në Malishevë
Pasditen e së hënës ka ndodhur një tërmet në zonën e Malishevës. Siç rapor...
-
Nënsekretarja e Shtetit për Diplomacinë Publike në ShBA do të vizitojë Kosovën
Nënsekretarja e Shtetit për Diplomacinë Publike në Departamentin Amerikan e S...
-
Bislimi takohet në Budapest me kryetarin e Komitetit për Punë të Jashtme të Hungarisë, flasin për objektivat e Kosovës për integrim
Vizita zyrtare në Budapest e zëvendëskryeministrit të parë për Integrim Evrop...
-
Qeveria konfirmon se Kurti të enjten është në Mal të Zi për Samitin me liderët rajonalë dhe të BE-së
Qeveria ka konfirmuar se kryeministri i Kosovës, Albin Kurti do të marrë pjes...
-
Kryeministri Kurti: Mbi 1.4 milionë banor residentë janë regjistruar deri më tani, një përqindje e lartë edhe e serbëve
Kryeministri Albin Kurti ka bërë të ditur se deri tani janë regjistruar mbi 1...
-
Vrasja në ‘Bon Vivant’, Andi Pajazitit i vazhdohet paraburgimi edhe për dy muaj
Andi Pajazitit i cili njihet me nofkën “Italiani”, i është vazhduar masa e pa...