Të gjithë ata që janë kthyer në punë pasi kanë humbur vendet e punës për shkak të pandemisë mund të përfitojnë nga 100 euro.

Administrata Tatimore e Kosovës përmes një njoftimi ka bërë të ditur se të punësuarit mund të aplikojnë për subvencionim të pagës, në kuadër të Pakos së Ringjalljes Ekonomike të Qeverisë së Kosovës, shkruan Gazeta Infokus.

ATK ka bërë të ditur se sipas vendimit të Qeverisë së Kosovës, lidhur me Pakon e Ringjalljes Ekonomike të drejtë aplikimi kanë të gjithë të punësuarit e rinj, të cilët janë të deklaruar në Administratën Tatimore të Kosovës për periudhat nga Korrik/2021 e tutje.

“Bazuar në vendimin e Qeverisë së Republikës së Kosovës Nr. 13/19, datë 14.07.2021, lidhur me Pakon e Ringjalljes Ekonomike, si dhe Vendimet e Ministrit të Ministrisë së Financave, Punës dhe Transfereve, gjegjësisht Vendimet për subvencionim sipas masave: 1.1 – Rikthimi në punë i atyre që kanë humbur vendin e punës gjatë pandemisë; 1.2 – Mbështetja për të punësuarit e formalizuar, si dhe 1.3 – Mbështetja e punësimit të grave, Administrata Tatimore e Kosovës, ka zhvilluar aplikacionin dhe tashmë të punësuarit mund të parashtrojnë kërkesat e tyre për të përfituar nga këto masa. Të drejtë aplikimi kanë të gjithë të punësuarit e rinj, të cilët janë të deklaruar në Administratën Tatimore të Kosovës për periudhat nga Korrik/2021 e tutje”, thuhet në njoftim.

ATK njofton se aplikimi mund të bëhet përmes Aplikacionit të publikuar në ueb-faqe të ATK-së http://www.atk-ks.org/

Pra, përmes ueb-faqes së ATK-së, të punësuarit kanë mundësi të aplikojnë për të përfituar nga masat e Pakos së e Ringjalljes Ekonomike, si:

• Masa 1.1 – Rikthimi në punë i atyre që kanë humbur vendin e punës gjatë pandemisë – Mbështetje për tre (3) muaj nga njëqind euro (100€);

• Masa 1.2 – Mbështetja për të punësuarit e formatizuar – Mbështetje për tre (3) muaj nga pesëdhjetë euro (50€);

• Masa 1.3 – Mbështetja e punësimit të grave – Mbështetje për tre (3) muaj nga pesëdhjetë euro (50€);

Aplikimi do të jetë i hapur deri më 15 tetor 2021 në ora 24:00.

Aplikacioni “Pako e Ringjalljes Ekonomike – Kërkesë për subvencionim të pagës” është në dispozicion të tatimpaguesve, gjegjësisht të punësuarve në ueb-faqen e ATK-së ëëë.atk-ks.org – tek linku Shërbimet elektronike, transmeton Gazeta Infokus. /Gazeta Infokus/

Black Friday ne Artmotion

Sponsoruar