Për të shmangur gabimet gjatë provave me të sëmurët, disa kompani janë duke testuar rritjen e tumoreve identikë tek minjtë. Provat kanë treguar se shpesh ilaçet që kanë rezultat tek minjtë, kanë edhe tek njerëzit.

Ky mi është infektuar me të njëjtin tip kanceri të gjirit që ka prekur pacienten Eileen Youtie.

“Unë kam llojin e kancerit të gjirit që quhet “Triple Negative”. Kam trashëguar një mutacion gjenetik që m’i shton 80 për qind shanset për t’u prekur nga ky kancer.”

Youtie pagoi kompaninë “Champions Oncology”, me bazë në Nju Xhërsi, që të gjente një trajtim për të luftuar sëmundjen.

“Ne mbjellim qeliza tumorale të pacientëve me kancer tek një mi që ka mungesë imuniteti, ose që e ka të dëmtuar sistemin imunitar, në mënyrë që tek ai të rritet tumori; pastaj eksperimetojmë me kimioterapi të ndryshme, për të gjetur se cilat do të kenë më tepër rezultat tek pacienti.”

Doktore Davies thotë se laboratori mund të provojë ilaçe të ndryshme tek një numër minjsh njëkohësisht. Youtie ka mundësinë të zgjedhë mes disa ilaçeve.

“Ne morëm rezultatet dhe kimioterapia më pak toksike pati të njëjtin rezultat si edhe ajo më tepër toksike.”

Por përdorimi i minjve si mostra eksperimentale për ilaçet kushton shumë. Eileen Youtie pagoi 30 mijë dollarë, sepse ajo donte që kompania Champions të provonte për të një numër të madh ilaçesh.

Po ashtu, nuk ka garanci për suksesin. Nëse një trajtim ka rezultat tek miu, shanset që ai të funksionojë tek pacienti janë vetëm 50 për qind. Por nëse kimioterapia nuk funksionon tek miu, nuk funksionon as tek pacienti.

Një tjetër e metë është se pacientët e vonojnë trajtimin e kancerit deri sa të vijnë rezultatet laboratorike të miut.

Mbetet ende të provohet nëse ekperimentimi i kimioterapive tek miu është më mirë se sa gjykimi i një mjeku të mirë.

Kimioterapia që zgjodhi Youtie pati rezultat dhe ajo është e kënaqur me zgjedhjen që bëri, për ta provuar ilaçin më parë tek miu dhe më pas për t’iu nënshtruar vetë kimioterapisë.