Instituti i Kosovës për Drejtësi (IKD) ka reaguar pas thirrjes së një takimi të jashtëzakonshëm të Këshillit Prokurorial të Kosovës (KPK), ku pritet të diskutohet performanca e Kryeprokurorit të Prokurorisë Speciale të Republikës së Kosovës (PSRK).

Sipas komunikatës së IKD-së, takimi është thirrur për sot, më 2 tetor, në ora 15:00. Instituti ka shprehur shqetësim për mënyrën dhe urgjencën e trajtimit të kësaj çështjeje.

IKD thekson se llogaridhënia është e domosdoshme, por, sipas tij, ajo nuk duhet të shërbejë si arsyetim për procedura të shpejta dhe të paqarta ndaj një kryeprokurori, veçanërisht në një periudhë kur PSRK-ja po trajton raste që lidhen me krimin e organizuar dhe krimin transnacional, përfshirë bashkëpunimin me shtete partnere.

-Advertisement-

“Llogaridhënia nuk duhet dhe nuk mund të përdoret si arsyetim për vendimmarrje me procedura të shpejta dhe të paqarta ndaj një kryeprokurori”, thuhet në reagim.

Instituti ka rikujtuar edhe rastin e Besim Kelmendit, i cili në fund të vitit 2025 ishte shkarkuar nga KPK-ja nga pozita e ushtruesit të detyrës së Kryeprokurorit të Shtetit. Sipas IKD-së, ky vendim ishte anuluar më pas nga Gjykata Supreme si i kundërligjshëm.

IKD vlerëson se ky rast duhet t’i shërbejë KPK-së si mësim institucional për të shmangur, siç i quan Instituti, praktikat e vendimmarrjes së ngutshme.

Sipas IKD-së, çdo proces që mund të prekë pozitën apo mandatin e një kryeprokurori duhet të zhvillohet në përputhje me Kushtetutën, legjislacionin në fuqi dhe praktikën gjyqësore.

Instituti kërkon që çdo vlerësim i performancës së Kryeprokurorit të PSRK-së të jetë profesional, i drejtë, i paanshëm dhe i bazuar në indikatorë të matshëm, duke respektuar njëkohësisht pavarësinë e prokurorëve në trajtimin e rasteve individuale.

“Kërkesa për llogaridhënie nuk duhet të përdoret si instrument apo mënyrë për ndërhyrje në pavarësinë funksionale të një zyre prokuroriale, sikurse pavarësia nuk mund të shfrytëzohet si arsyetim për mungesë të llogaridhënies”, thuhet tutje në komunikatë.

IKD thotë se nuk e sheh të qartë urgjencën për mbajtjen e takimit pa përfunduar dhe shteruar, sipas tij, të gjitha mjetet juridike në dispozicion.

Në fund, Instituti i ka kërkuar KPK-së të garantojë një proces të drejtë dhe të pavarur dhe të mos ndërmarrë veprime që mund të cenojnë sigurinë juridike, funksionalitetin e PSRK-së, besimin në KPK dhe perceptimin për pavarësinë e sistemit prokurorial./Gazeta Infokus

Udhëto Oslo – Prishtinë çdo javë me PrishtinaTickets

Sponsoruar

-Advertisement-