Lajme

I bllokuar në Serbi është edhe zëvendësdrejtori i Policisë së Kosovës, Dejan Jankoviç

Autori: Gazeta inFokus 14:20 | 17 April 2024

Në mesin e mijëra qytetarëve që janë bllokuar në Serbi, në kufirin me Kroaci, gjendet edhe zëvendësdrejtori i Policisë së Kosovës, nga komuniteti serb, Dejan Jankoviç.

Kështu ka bërë të ditur përmes një shkrimi në platformën X, Jeton Zulfaj, këshilltar i kryeministrit të Kosovës Albin Kurti, shkruan Gazeta Infokus.

“Putini i vogël në Beograd nuk mund ta përballojë suksesin e Kosovës. Pas votimit të suksesshëm të djeshëm në APKE ai ka nisur arrestime masive në pikat kufitare, duke ndaluar qindra qytetarë të Kosovës, duke përfshirë edhe zëvendësdrejtorin e Policisë së Kosovës, Dejan Jankoviç (i cili është nga komuniteti serb”, ka shkruar Zulfaj.

-Advertisement-

“Të gjithë po mbahen peng, mes tyre dhjetëra fëmijë, pa u siguruar ushqim dhe mjekim. Kjo është një shkelje e hapur e Marrëveshjes për Lirinë e Lëvizjes në Procesin e Berlinit midis BB6 dhe një përpjekje për të përshkallëzuar tensionet”, ka shtuar ai.

Ndërsa nga Ministria e Punëve të Jashtme të Kosovës kanë deklaruar se kanë njoftuar vendet e QUINT-it pasi qindra qytetarë të Kosovës janë bllokuar në Serbi në pikëkalimin kufitar me Kroacinë.

“Pas veprimeve arbitrare të Serbisë, institucionet tona, Ministria e Punëve të Jashtme dhe Diasporës ka njoftuar shtetet e KUINT-it, Institucionet e BE-së dhe të tjera ndërkombëtare rreth kësaj situate dhe presim që kjo situatë të përfundojë shpejtë”, thuhet në reagim.

Sipas MPJ-së, qytetarët e Kosovës që po vinin në drejtim të Kosovës janë ndaluar edhe në kufirin me Hungarinë, në pikat kufitare në Shid dhe Suboticë, te vendkalimi kufitar Dheu i Bardhë dhe nuk po lejohen as të lëvizin përpara dhe as të kthehen pas.

“Për më tepër, të gjithë udhëtarëve u janë marrë dokumentet personale si dhe ato të autobusëve. Po ashtu, disa prej tyre janë marrë dhe po vazhdojnë të merren në pyetje.Apelojmë tek të gjithë bashkatdhetarët dhe qytetarët që janë në lëvizje të evitojnë me çdo kusht kalimin nëpër Serbi dhe të ndjekin me vëmendje situatën”.

Subscribe në YouTube: GAZETA INFOKUSI