Kreu i agjencisë britanike të inteligjencës GCHQ sot deklaroi se hakerët nga shtetet armiqësore po përpiqeshin të vidhnin kërkimet sekrete të vaksinës kundër koronavirusit të ri (COVID-19).

Drejtori i GCHQ, Jeremy Fleming tha se hakerët kishin shënjestruar infrastrukturën shëndetësore të Mbretërisë së Bashkuar dhe laboratorët e kërkimeve.

“Ne e dimë se pavarësisht nëse janë shtete apo kriminelë, ata janë vënë pas gjërave që janë të ndjeshme për ne”, tha Fleming. “Pra, është një prioritet i lartë për ne që të mbrojmë sektorin e shëndetësisë, veçanërisht garën për të arritur deri tek vaksina”.

-Advertisement-

Krerët e GCHQ, agjencia e inteligjencës për mbledhjen dhe analizimin e sinjaleve elektronike dhe komunikime të Mbretërisë së Bashkuar, rrallë japin intervista. Kjo intervistë u dha në Festivalin e Shkencave Cheltenham.

Hakerët ishin “në kërkim të dobësive themelore”, përfshirë “joshjet duke i bërë njerëzit të klikojnë në diçka të gabuar … ku njerëzit nuk rezervohen sa duhet ose ku kanë fjalëkalimet themelore apo të ngjashme”.

Megjithëse Fleming nuk e përmendi Kinën me emër, “Guardian” raportoi se burimet thanë se Kina shpesh ishte përfshirë.

“Si Mbretëri e Bashkuar, ne e shohim Kinën si një kundërshtar të inteligjencës. Ne i shohim ata si partner ekonomik. Ne punojmë me ta në disa fusha, ne konkurrojmë me ta në fusha të tjera. U bëjmë thirrje sjelljeve të tyre kur nuk mendojmë se përputhen me ato që presim të shohim ose me vlerat tona”, tha ai.

Ish-kreu i agjencisë së jashtme të inteligjencës në Mbretërinë e Bashkuar, MI6, Sir Richard Dearlove tha dje se ai besonte se COVID-19 ishte i produkt njerëzor dhe i nxjerrur rastësisht nga një laborator kinez.

Dearlove drejtoi agjencinë në vazhdën e luftës në Irak, midis viteve 1999 dhe 2004.

Ai për “Daily Telegraf” tha se kishte parë hulumtime “shumë të rëndësishme”, ku shkencëtarët pretendonin se kishin identifikuar “seksione të vendosura në sipërfaqen e Sars-CoV-2 Spike” që lidhet me qelizat njerëzore dhe ishin “dukshëm të ndryshme nga çdo Sars që kemi studiuar”.

“Unë nuk mendoj se kjo filloi si një aksident”, tha ai.

“Kjo shtron çështjen nëse Kina do të pranonte ndonjëherë përgjegjësinë dhe të paguajë dëmshpërblimet? Mendoj se kjo do ta bëjë që çdo vend të botës të rimendojë se si do të trajtojë marrëdhëniet me Kinën dhe si të sillet bashkësia ndërkombëtare ndaj udhëheqjes kineze”, tha ai.

Hulumtimi në fjalë është hedhur poshtë gjerësisht si nga shkencëtarët, ashtu edhe nga zyrtarët e sigurisë si dhe nga profesori Angus Dalgleish, i cili punon në Spitalin St.George në Universitetin e Londrës dhe është një ish-kandidat për UKIP, një parti e krahut të djathtë britanik.

Sekretari britanik i Shëndetësisë, Matt Hancock ka thënë më parë se qeveria nuk kishte parë “asnjë provë” për të sugjeruar se virusi ishte prodhuar në një laborator.

Megjithatë, kjo teori u bë e njohur nga presidenti i SHBA-ve, Donald Trump./AA/

VIVA FRESH E SHPALL KREEEEJT MUAJIN BLACK NOVEMBER!

Sponsoruar

-Advertisement-