Sport

Guardiola i “tërbuar” pas eliminimit në Kupë: Kështu nuk kemi asnjë shans

Autori: Gazeta inFokus 09:44 | 12 Janar 2023

Southampton befasoi Manchester City-n në çerekfinalen e EFL Cup me “Shenjtorët” që gjetën në një ditë jo të mirë të besuarit e trajnerit Pep Guardiola. Vendasit triumfuan me rezultatin 2-0 dhe i eliminuan “The Citizens” nga Kupa që koleksionuan kështu zhgënjimin e parë në këtë sezon. Pas sfidës, tekniku Guardiola ishte i tërbuar me të tijtë ndërsa nuk munguan kritikat nga ana e spanjollit që theksoi se skuadra e tij nuk ishte fare në fushë.

“Fitoi skuadra më e mirë, nuk luajtëm aspak mirë. E nisëm ndeshjen në mënyrën më të shëmtuar, nuk ishte një performancë e denjë. Ndaj Southampton nuk treguam as një grimcë nga ajo që jemi në të vërtetë. Nuk ishim të përgatitur dhe kështu nuk mund të shkonim në gjysmëfinale.

Kur luan për një skuadër si Manchester City, duhet të jesh i përgatitur në çdo ndeshje dhe nëse luajmë kështu përgjatë sezonit, atëherë nuk kemi asnjë shans për sukses. Unë mendoj se problem nuk ishin emrat që e nisën ndeshjen, por problem është performanca në përgjithësi. Nuk ishim në fushë”, u shpreh Guardiola.

-Advertisement-