“Me 22 vjet përvojë me kancer, jam ende gjallë dhe ende punoj”. Kështu e përshkruan Nafije Latifi rrugëtimin e saj me kancerin e gjirit, një përballje që, përveç sfidave personale, e ka shtyrë të angazhohet për ndërgjegjësimin dhe mbështetjen e grave të tjera që diagnostikohen me këtë sëmundje.

E ftuar në emisionin “Doktor Plus” me Arjeta Osmanin, në Gazetën Infokus, themeluesja e Shoqatës “JETA/VITA” ka ndarë përvojën e saj personale, duke përcjellë një mesazh shprese për të gjithë personat që po kalojnë nëpër të njëjtën sfidë.

“Vetë fakti që unë, me 22 vjet përvojë me kancer, jam ende gjallë dhe ende punoj, është një motiv për ato gra dhe ata persona që përballen me sëmundjen tash, se kjo sëmundje nuk është gjithherë vdekjeprurëse”, ka deklaruar Latifi.

-Advertisement-

Për të, përballja me kancerin nuk duhet të nënkuptojë heqjen dorë nga jeta dhe planet për të ardhmen. Ajo thotë se pacientët kanë nevojë për mbështetje emocionale e psikologjike, por edhe për forcën që të vazhdojnë përpara.

“Kjo sëmundje mund të përballohet dhe njerëzit duhet të vazhdojnë jetën. Duhet të gjejnë forcën në vete për të vazhduar sa më gjatë dhe sa më mirë”, është shprehur ajo.

Duke folur nga përvoja e saj, Latifi ka theksuar se kujdesi i vazhdueshëm shëndetësor mbetet i rëndësishëm për personat që janë diagnostikuar me kancer.

“Të kenë kujdes për veten, të bëjnë kontrollet e rregullta, të marrin barnat, t’i respektojnë protokollet dhe këshillat mjekësore”, ka porositur ajo.

Por për Latifin, një nga ndryshimet më të mëdha ndër vite është edhe mënyra se si shoqëria kosovare e trajton sot kancerin e gjirit.

Ajo kujton se dikur kjo sëmundje shoqërohej me heshtje dhe paragjykime, ndërsa sot Muaji Rozë mobilizon institucione, shkolla, kompani dhe organizata në të gjithë vendin.

“Me vetë faktin që sot, në 7 tetor, bëhet rozë jo vetëm në Prishtinë, por në të gjitha viset e Kosovës, që çdo shkollë organizon diçka, çdo kompani, çdo institucion, çdo ministri, çdo qendër e mjekësisë familjare, për neve mjafton me pa që na kemi arritë ndërgjegjësim”, ka thënë Latifi.

Pas më shumë se dy dekadash përballjeje me sëmundjen dhe angazhimi për pacientet, Nafije Latifi vazhdon ta ndajë historinë e saj me gratë që sapo kanë marrë diagnozën, duke u treguar përmes përvojës personale se jeta mund të vazhdojë edhe pas diagnostikimit me kancer.

Rrëfimi i saj në “Doktor Plus” vjen gjatë Muajit Rozë, në një periudhë kur vëmendja i kushtohet zbulimit të hershëm të kancerit të gjirit, mbështetjes së pacienteve dhe rëndësisë së kujdesit të vazhdueshëm shëndetësor.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-