Lajme

Drama në veri ka të bëjë me planin franko-gjerman, vlerëson Blerim Latifi

Autori: Gazeta inFokus 12:05 | 13 December 2022

E tëra kriza në pjesën veriore të vendit ka të bëjë me planin franko-gjerman, vlerëson filozofi Blerim Latifi.

Mbështetja që ky plan gëzon nga 27 vendet e BE-së dhe nga vetë Kosova, për Latifin, ka bërë që Serbia të veprojë në kundërshti të saj. Dhe atë, sipas tij, për të shmangur persionin ndërkombëtar ndaj këtij refuzimi, ka krijuar një krizë të re.

“[Aleksandar] Vuçiqi ka nxitur rebelimin e serbëve në veri dhe ka nisur propagandën për rikthimin e ushtrisë serbe në Kosovë. Kjo është logjika e horrave në politikë: që të shmangin një problem, e krijojnë një tjetër; për t’i ikur një krize, e shpikin një krizë tjetër”, ka shkruar Latifi.

-Advertisement-

Derisa Latifi vlerëson se Qeveria e Kosovës vetëm se po mbron Kushtetutën e Republikës së Kosovës, megjithatë thotë se janë bërë edhe gabime parapraprake. Parasegjithash, thotë ai, “shpërfillja e kërkesave amerikane”.

“Shpresojmë të ketë marrë mësimet e duhura nga këto gabime”, tha ai.

Shkrimi i plotë i Blerim Latifit:

E gjithë kjo dramë e Veriut lidhet me planin franko-gjerman.

Dje Borrelli tha se 27 vendet e BE-së janë pajtuar me planin.

Kosova ka dhënë shenja të qarta se pajtohet me të. Serbia, ndërkaq, duket se e ka refuzu.

Që të shmangë presionin ndërkombëtar për shkak të refuzimit, Vuçiqi ka nxitur rebelimin e serbëve në veri dhe ka nisur propagandën për rikthimin e ushtrisë serbe në Kosovë.

Kjo është logjika e horrave në politikë: që të shmangin një problem, e krijojnë një tjetër; për t’i ikur një krize, e shpikin një krizë tjetër.

Në këtë kontekst Kosova thjesht po përpiqet të mbrojë atë që thuhet në ligjin e saj themelor, në Kushtetutën e Republikës.

A ka bërë kryeministri Kurti gabime në këtë drejtim?

Po, disa.Parasegjithash duke i shpërfillur këshillat amerikane, duke besuar se mund t’ia dalë i vetëm në vendosjen e rendit në veri dhe duke këmbëngulur në pikëpamjen e tij të vjetër se shkaku i problemit të veriut gjendet në Prishtinë.

Shpresojmë të ketë marrë mësimet e duhura nga këto gabime.

Ky është thelbi i krejt kësaj drame.Të tjerat janë kakofoni e transheve partiake dhe e platformave të mosdurimit personal.

Subscribe në YouTube: GAZETA INFOKUSI