Kryetari i Odës Ekonomike të Serbisë, Marko Cadez konsideron se Kosova dhe Serbia duhet të jenë pjesë e tregut të përbashkët të Bashkimit Evropian. Ai mendon se edhe politika në të dy vendet duhet të fillojë të mendojë për të ardhmen pasi për më shumë se dy dekada kanë ngecur në tema të njëjta.

Cadez, thotë se të dy vendet duhet të punojnë më shumë për të zhvilluar ekonominë.

“Ne jemi pjesë e të njëjtit rajon, jemi pjesë e ndërtimit ekonomik europian. Ne jemi të varur nga tregjet evropiane, shumicën e mallrave tona po i eksportojmë në tregjet evropiane, kështu që në thelb problemet që ndajmë janë pak a shumë të njëjta. Ekonomitë ndoshta mund të zhvillohen ndryshe, me një strukturë tjetër, industri të tjera të rëndësishme, por në thelb ne duhet të punojmë më shumë së bashku me Europën për të arritur rritje reale, ajo që dua të them me rritjen reale është se ne duhet të jemi pjesë e një tregu të vetëm të Bashkimit Europian sa më shpejt të jetë e mundur”, deklaroi Cadez.

Derisa flet për rëndësinë e të punuarit së bashku me Evropën, Cadez thotë se edhe Evropa duhet të ketë ide të qarta për Ballkanin Perëndimor me qëllim të gëzimit të të lirive të plota tregtare.

“Në thelb neve na duhet që Evropa të jetë vendimtare, të jetë e qartë dhe të kemi një vizion të qartë për këtë rajon, të mos flasim më për përralla, por të flasim shumë konkretisht, të themi se jemi pjesë e tregut të përbashkët, se mund të gëzojmë liri të plota”, vijon Cadez.

Cadez është kritik edhe ndaj politikës në të dy shtetet për shkak të problemeve, që i ai quan, të njëjta dhe që nuk po ndihmojnë për të ardhmen.

“Politika sigurisht që po ndikon dhe mendoj se është koha që edhe politikanët të prodhojnë të ardhmen dhe jo të prodhojnë më të shkuarën. Sepse, unë kam një vajzë, ajo ka lindur në vitin 2001, ajo tani është 22 vjeç dhe do të jetë 23 vjeç shumë shpejt dhe gjatë këtyre 23 vjetëve po flasim për të njëjtat çështje, po flasim për të njëjtat tema, po diskutojmë në të njëjtat mënyra, po luftojmë në të njëjtat mënyra”, thotë Cadez.

Cadez shprehet se gjenerata e re në Kosovë dhe Serbi është gati të bashkëpunojë, ndërsa shton se komuniteti i biznesit dëshiron të flasë nga këndi i interesit të përbashkët.

Kreu i Odës Ekonomike të Serbisë sugjeron Qeverinë e Kosovës që të programimi dhe kodimi të bëhet pjesë e kurrikulave mësimore që në shkollat fillore dhe të jetë lëngë obligative.

“Është çmenduri, sepse nëse e shihni gjeneratën e re tani, kemi pasur së bashku me Odën Ekonomike të Kosovës, para disa ditësh, kemi pasur një forum biznesi në Berlin me kompani të IT nga Kosova dhe Serbia dhe kompani të IT nga Gjermania dhe nëse e shihni se si këta njerëz flasin me njëri-tjetrin, kjo është bota reale, ajo ku jetojnë politikanët është bota virtuale, nuk ekziston më. Pra, në thelb qëllimi ynë i komunitetit të biznesit është shumë i thjeshtë, të përpiqemi të flasim nga këndi i interesit të përbashkët, jo i dallimeve të përbashkëta”, vijon Cadez.

Kryetari i Odës Ekonomike të Serbisë, Marko Cadez qëndroi në në Prishtinë për të marrë pjesë në konferencën finale të projektit të Bashkimit Evropian (BE) për mbështetjen e Forumit të Investimeve të Ballkanit Perëndimor, në të cilën u theksua potenciali për zhvillimin ekonomik dhe përfshirja në strukturat evropiane sa më shpejtë të jetë e mundur.

Udhëtoni drejt Berlinit me PrishtinaTicket me çmime speciale!

Sponsoruar