Lajme

Anti-terrorizmi në aksion, arrestohen 5 të dyshuar – sekuestrohen edhe disa armë

Autori: Gazeta inFokus 14:07 | 15 May 2023

Drejtoria Kundër Terrorizmit në koordinim me Prokurorinë Speciale, kanë arritur të arrestojnë pesë persona të dyshuar L. B., B. V., E. B., A. H. dhe A. S., për terrorizëm e armëmbajtje pa leje.

“Drejtoria Kundër Terrorizmit, në koordinim me Prokurorinë Speciale, pas hetimeve disamujore, sot, me datën 15/05/2023, ka ndërmarrë operacion policor në gjashtë lokacione, në rajonin e Pejës, Prishtinës dhe Gjilanit, për zbatimin e urdhëresës për kontroll, të lëshuar nga Gjykata Themelore në Prishtinë, Departamenti Special”, thuhet në njoftim.

Sipas njoftimit, si rezultat i këtij operacioni, nën dyshimin e kryerjes së veprave penale ‘shtytje në kryerjen e veprës terroriste, sipas nenit 134 të KPRK-së’ dhe ‘mbajtje në pronësi, kontroll ose posedim të paautorizuar të armëve’, sipas nenit 366 të KPRK-së, janë arrestuar pesë persona të dyshuar (L. B., B. V., E. B., A. H. dhe A. S.), ndaj të cilëve janë duke vijuar procedurat ligjore.

-Advertisement-

Sipas policisë, të dyshuarit e lartcekur janë të njohur për Policinë e Kosovës, si të dyshuar për përfshirjen e tyre të mëparshme në disa vepra tjera penale në rajonin e Pejës.

Në cilësinë e provave dhe dëshmive materiale janë sekuestruar:
 tri (3) revole,
 një armë automatike AK-47,
 një armë rekreative pneumatike,
 pajisje elektronike dhe dëshmi tjera relevante lidhur me rastin.

Me urdhër të prokurorit të Prokurorisë Speciale, të dyshuarit ndalohen në ndalim policor, në kohëzgjatje prej 48 orëve.

Subscribe në YouTube: GAZETA INFOKUSI