Ekonomi

Albin Kurti nuk kursen as drejtuesit e suksesshëm të ndërmarrjeve publike

Autori: Gazeta inFokus 14:21 | 24 April 2020

Qeveria e Kosovës nëpërmjet bordit të ri, të caktuar një ditë më parë, ka shkarkuar drejtorin e Korporatës Energjetike të Kosovës, Njazi Thaçi.

Bazuar në raportin e Performancës së Ndërmarrjeve Publike, mbi të cilin është marrë vendimi për shkarkimin e Thaçit, nga 17 Ndërmarrje Publike Qendrore, KEK del të jetë e vetmja me performancë të mirë financiare.

Kjo ndërmarrje publike, vitin 2019 e ka mbyllur me 23 milionë euro profit që shënon një rritje rekord prej 30% me shumë sesa vitin paraprak.

-Advertisement-

Të hyrat e realizuara për periudhën raportuese, Janar – Nëntor 2019, kanë arritur shumën prej 166.9 milionë euro, nga kjo shumë vetëm nga eksporti i energjisë elektrike janë realizuar 20 milionë euro.

Derisa ndërmarrjeve tjera iu ka gjetur një varg shkeljesh e lëshimesh menagjeriale KEK është radhitur në top listën e këtij raporti të Ministrisë së Zhvillimit Ekonomik, përkatësisht Njësisë për Politikat dhe Monitorimin e Ndërmarrjeve Publike, e që është hartuar nga një auditor i jashtëm.

Sipas këtij raporti KEK vazhdon të jetë “një korporatë financiarisht e vetë qëndrueshme, ka vazhduar të investoj në projekte kapitale me mjete vetanake, në kapacitete e saj prodhuese dhe gjeneruese të energjisë elektrike si dhe investimeve kapitale në përmirësimin e ambientit”.

Po ashtu në të gjitha kategoritë Korporata Energjetike e Kosovës është vlerësuar maksimalisht nga të gjitha ndërmarrjet tjera.

Pikë maksimale, prej 4.97 nga 5 sa është maksimalja kjo ndërmarrje ka marr për implementimin e politikave të Bordit, raporton gazeta Infokus.

Menaxhimi financiarë është vlerësuar me 4 pikë, ndërsa auditimi është vlerësuar me 3 pikë.

Edhe transparenca e kësaj ndërmarrje publike është vlerësuar jashtëzakonisht mirë nga ky auditim i pavarur.

Në të gjitha këto kategori pikë më të larta se sa KEK nuk ka marr asnjë nga të gjitha ndërmarrjet publike qendrore.

Auditori ka vlerësuar edhe angazhimin dhe përgjegjësin e lartë që ka treguar kjo ndërmarrje në raport me aksionarin përkatësisht Ministrinë e Zhvillimit Ekonomik.