Projektligji për RTK-në që pritet të votohet të enjten në Kuvend, parasheh që t’ia shtojë në konto KEDS-it rreth 2.5 milionë euro.

Këto para pritet që KEDS-i t’i fitojë për një vit nga faturat e rrymës, në të cilat do të futet edhe një pagesë shtesë për Radio Televizionin e Kosovës, shkruan Gazeta inFokus.

Kjo formë e financimit, po kundërshtohet nga deputetët e Opozitës, pasi ajo mund të bëhet edhe përmes Postës së Kosovës.

Ndërmarrja publike që po kalon nëpër një gjendje të rëndë financiare mund ta kryej këtë shërbim, madje me një kosto më të lirë se KEDS-i.

Këtë propozim, deputeti i LDK-së, Imet Rrahmani thotë se e ka bërë edhe në komisionin për Administratë Publike, ku është anëtar.

“Edhe gjatë punës në Komision ne si LDK kemi shprehur dilema tek mbledhja e këtyre parapagimeve. E kemi shprehur mundësinë që të bëhet edhe përmes rrugëve të tjera e jo vetëm përmes KEDS-it, sepse ajo e ka një kosto më të lartë. Në kosto ma të lehtë e më të lirë kishte me qenë Posta e Kosovës”, ka thënë Rrahmani për Gazetën inFokus.

“Kur kam qenë ministër i Shëndetësisë e kemi pasur një marrëveshje me Postën për mbledhjen e Premiumeve kemi bërë marrëveshje pikërisht me Postën për shkak të kostos më të ulët në raport me bankat komerciale”, ka theksuar Rrahmani.

Për këtë çështje, kryetari i komisionit parlamentar për Administratë Publike, Nait Hasani nuk ka dashur të flas.

Përmes telefonit ai ka deklaruar se do të flas pasi të kalojë projektligji.

E deputeti i Nismës Socialdemokrate, Milaim Zeka ka treguar se përgjatë punës në komision të gjitha mundësitë kanë mbetur të hapura.

“Të gjitha variantet janë të hapura. Unë e di që gjatë debatit e kemi lënë edhe përmes Postës edhe çdo variant. Kështu që kaq mund të them. Unë personalisht të gjitha variantet i përkrah, cilido që është në të mirë të qytetarëve. Pse mos me shku tek Posta, për mua është krejt e logjikshme. Për gjendjen financiare nuk ka gajle sepse këta vet e kanë vjedh postën, për ata nuk ka lidhje. Unë mendoj tek interesi i qytetarit, e jo tek interesi i Postës. Por qytetarit ku t’i vjen ma mirë e ma lirë, që mos me prit në sportele. Edhe përmes KEDS-it edhe përmes Postës, dyjat”, ka theksuar Zeka.

Për këtë çështje Gazeta inFokus është në pritje të një qëndrimi edhe nga Posta e Kosovës. /Gazeta inFokus