Lajme

OSBE bën fushatë për mbrojtjen e gazetarëve në Kosovë

Autori: Gazeta inFokus 15:37 | 08 June 2018

Misioni i Organizatës për Siguri dhe Bashkëpunim Evropian (OSBE) në Kosovë po vazhdon fushatën për vetëdijesimin e publikut rreth sigurisë së gazetarëve në mbarë Kosovën.

Në një komunikate për media, OSBE thekson se fushata adreson sfidat e vazhdueshme, me të cilat përballen gazetarët gjatë punës së tyre dhe ndikimin e këtyre sfidave në punën e tyre.

Fushata e OSBE-së thekson edhe rëndësinë e gjetjes së autorëve të çdo forme kërcënimi ose sulmi ndaj gazetarëve, në mënyrë që sulmet e tilla të parandalohen në të ardhmen.

-Advertisement-

“Gazetarët janë të ekspozuar ndaj rreziqeve specifike të frikësimit, kërcënimeve apo sulmeve fizike për shkak të punës së tyre. Është e rëndësishme që secili pjesëtar i shoqërisë ta kuptojë nevojën për të mbrojtur gazetarët dhe për të kontribuar për një mjedis që respekton lirinë e fjalës dhe lirinë e medias”, citohet të ketë thënë shefi i Misionit të OSBE-së në Kosovë, Jan Braathu.