Të 23-in e presin me padurim çdo muaj.

Mbi 260 mijë kosovarë këtë ditë i tërheqin nga bankat paratë e pensioneve me të cilat shumica prej tyre e sigurojnë edhe jetesën.

Një pjesë e konsiderueshme e tyre janë veteranë të luftës së Ushtrisë Çlirimtare të Kosovës.

Në tërë vendin, vetëm në vitin 2017, pensione nga buxheti i shtetit kanë marrë 269 mijë e 401 persona.

Shifër kjo që i përfshin të gjithë përfituesit e pensioneve, pa marrë parasysh kategorinë, shkruan Infokusi.com.

Për të gjithë këta janë shpenzuar nga buxheti 370 milionë euro.

Së paku kështu thuhet në raportin “Statistikat e Mirëqenies Sociale 2017”, që ka publikuar Agjencia e Statistikave të Kosovës.

Në bazë të këtij raporti, kategoria e personave që ka më së shumti përfitues e për të cilën shpenzohen më së shumti para është ajo e pensioneve bazike të moshës, pasuar nga ajo e pensioneve kontributpaguese të moshës dhe kategoria për pensionet e veteranëve.

Vetëm në këto tri kategori të pensioneve, janë përfitues 202 mijë e 48 persona.

E më së paku përfitues ka nga pensionet e Forcës së Sigurisë së Kosovës(FSK) dhe Trupave Mbrojtëse të Kosovës (TMK). 1 mijë e 289 persona marrin pensione për këto kategori.

Të tjerët janë persona me aftësi të kufizuara, pensionist të Trepçës, Skema e të verbërve, Pensionet e familjeve të dëshmorëve dhe invalidëve të luftës, Skema e ndihmës sociale dhe Skema për përkrahje financiare familjeve që kanë fëmijë me aftësi të kufizuara.

120 milionë euro pensione për veteranët

Një prej kategorive të pensioneve që i kushton shtetit miliona euro, është ajo e veteranëve.

Që kurë kanë filluar të marrin pensionet, veteranët i kanë kushtuar buxhetit të vendit më të varfër në rajon afër 120 milionë euro.

Kaq është shuma e parave që ka ndarë shteti prej vitit 2015 për këtë kategori, shkruan Infokusi.com.

Së paku kështu ka deklaruar zëdhënësi për media në Ministrinë e Punës dhe Mirëqenies Sociale, Musa Demiri.

“Shuma e shpenzuar për kategorinë e veteranëve të UÇK-së, që nga fillimi i zbatimit të kësaj skeme e deri në dhjetor të vitit 2017 ka qenë rreth 119 milionë e 136 mijë euro”, ka thënë Demiri.

Sipas të dhënave të MPMS-së, 2017’ta e ka rënduar më së shumti buxhetin e Kosovës. Vetëm gjatë vitit të kaluar për pagesa të veteranëve, shteti ka ndarë më shumë se 65 milionë euro.

“Për vitin 2015 (tetor-dhjetor) janë ndarë 5 milionë e 418 mijë euro, për vitin 2016 janë ndarë 47  milionë e 864 mijë euro dhe për vitin 2017 janë ndarë  65 milionë e 854 mijë euro”, ka thënë Demiri.

Demiri deklaron se aktualisht në skemën e përfitimit të pensioneve janë 37 mijë e 136 përfitues, që besohet të kenë qenë pjesëmarrës në luftë. (Arjeta Shabani)/Infokusi

UNICEF-i global boton artikull për rezultatet e partneritetit me Devolli Corporation: U fuqizuan gratë, përfituan familjet

Sponsoruar