Sport

Rikthehet Reali i fitoreve spektakolare

Autori: Gazeta inFokus 23:28 | 18 February 2018

Real Madrid ka shënuar një tjetër fitore në La Liga.

Pas fitores spektakolare në Ligën e Kampionëve ndaj PSG-së, ‘Los Blancos’ kanë vazhduar formën e mirë edhe në La Liga, duke e mposhtur 3:5 në udhëtim Real Betisin.

Pjesa e parë ishte e vështirë për skuadrën e Zinedine Zidanes, që edhe pse shënoi e para u përballë me shumë vështirësi pas dy golave të shpejtë të vendasve.

Marco Asensio në minutën e 11’ kaloi në epërsi 0-1 Real Madridin.

Vendasit u rikthyen në lojë, kur fillimisht në minutën e 33’ barazuan me Mandi, ndërsa tre minuta më vonë shënuan edhe golin e dytë, përmes Nachos që shënoi autogol.

-Advertisement-

Pjesa e dytë i takoi në tërësi Real Madridit, që shënoi katër gola.

Ishte Ramos që kishte “këmbën e mbarë” duke barazuar në 2:2 në minutën e 50’. Asensio nëntë minuta më vonë përmbysi epërsinë e Betisit, duke e kaluar për të dytën herë Realin në epërsi.

Në këtë maratonë golash, nuk mund të mungonte Cristiano Ronaldo që me një lëvizje të mirë dhe goditje të fortë brenda zonës, shënoi për 4:2.

Betis nuk u dorëzua lehtë, duke bërë më interesant fundin e takimit me golin e Leon në minutën e 85’, por kjo ishte e gjitha që bëri skuadra e Betisit, me Realin që realizoi edhe golin e pestë, me anë të Karim Benzema.

Real Madrid xhiron e ardhshme luan sërish në udhëtim, tani te Leganes.