Sport

Fadil Vokrri telegram ngushëllimi për familjen e Agim Binakut

Autori: Gazeta inFokus 16:48 | 09 February 2018

Gazetari i njohur kosovar Agim Binaku ka ndrruar jetë pas një sëmundjeje të shkurtër në moshën 62-vjeçare. Presidenti i FFK-së Fadil Vokrri i ka dërguar telegram ngushëllimi familjes së Agim Binakut.

Në telegramin ngushëllues të Vokrrit thuhet: “Lajmi për vdekjen e z. Agim Binaku, gazetarit shumëvjeçar të sportit na ka pikëlluar të gjithë neve dhe opinionin futbolldashës të Kosovës, ndaj në emrin tim, të KE të FFK-së dhe klubeve të futbollit Ju shprehim ngushëllimet tona më të thella dhe të sinqerta”.

Ky është telegrami i plotë ngushëllues i Fadil Vokrrit

E nderuara familje e z. Agim Binakut!

Të nderuar drejtues e punëtorë të RTV-21!

-Advertisement-

Të nderuar SHGSK-së!

Lajmi për vdekjen e z. Agim Binaku, gazetarit shumëvjeçar të sportit na ka pikëlluar të gjithë neve dhe opinionin futbolldashës të Kosovës, ndaj në emrin tim, të KE të FFK-së dhe klubeve të futbollit Ju shprehim ngushëllimet tona më të thella dhe të sinqerta.

Agimi, ishte njëra nga penat më të mprehta të gazetarisë sportive dhe jo vetëm kaq. Ishte i vyeshëm, vizionar dhe këmbëngulës në punën e tij. Kishte dhënë kontribut të madh në vitet 70-80 në Radio Prishtinë. Kontributi i Agim Binakut ishte i jashtëzakonshëm edhe në pavarësimin e sportit të Kosovës. Kur regjimi serb po mbyllte çdo dritare të informimit, Agimi gjente forcë e mbi të gjitha guxim, për të gjetur format e hapjes së dritareve të reja, përmes gazetave sportive si gazetave “Reflekse sportive”, “Top sporti” dhe më vonë në valët e Radios 21 dhe TV 21. Pas çlirimit të Kosovës. Agimi, bëhet digë edhe më e fortë e sportit e veçmas futbollit, duke qenë lajmëtari i parë i ngjarjeve të mëdha historike. Agimi ishte kryetari Shoqatës së Gazetarëve sportivë për një mandat dhe ishte nderuar me shumë çmime kombëtare dhe ndërkombëtare për gazetari. Familja humbi një familjar të devotshëm, RTV 21 një nga punëtorët më të zellshëm, gazetaria sportive, udhërrëfyesin dhe njeriun që shumë i dha sportit të Kosovës e FFK-ja humbi krahun më të fortë, lajmëtarin dhe sfiduesin e futbollit të Kosovës. Të gjithëve do të na mungojë përgjithmonë dhe kujtimi për Agimin do të jetë i përjetshëm.

Ne ndjejmë bashkë me ju dhembjen, por ju lusim që këtë humbje e dhembje ta përballoni sa më lehtë.

Presidenti i FFK-së

Fadil Vokrri

Subscribe në YouTube: GAZETA INFOKUSI