Lajme

Karburanti do të shtrenjtohet prapë

Autori: Gazeta inFokus 15:33 | 06 September 2017

Një taksë e re e parashikuar me vendim qeverie pritet ta bëjë edhe më të shtrenjtë çmimin e karburantit në vend. Në një artikull të fimosur nga Gjergj Erebara për Reporter.al thuhet se : “Pikat e shitjes së karburanteve do t’i paguajnë pushtetit vendor një tarifë licensimi — 3 milionë lekë për pikat që ushtrojnë veprimtarinë e tyre në Tiranë dhe një milion lekë për bashkitë e tjera.

Sipas Unionit të Shoqërive të Hidrokarbureve Shqiptare, taksa e re e licensimit ndaj pikave të shitjes me pakicë të karburanteve do të rrisë çmimin e karburantiit nga 1 në 10 lekë për litër, në varësi kjo të sasisë së karburantit të shitur nga njësia e taksuar.

Në gusht, Bashkia Tiranë vendosi të kërcënojë me bllokim pikat e karburanteve duke kërkuar tarifat e reja të licencimit. Duke mos e marrë mundimin për të fshehur faktin që kjo nuk është një tarifë licencimi por një taksë, nënkryetari i Bashkisë Tiranë Arbjan Mazniku deklaroi se këto të ardhura do të “shpenzohen për çerdhe, kopshte, lulishte, parqe”.

-Advertisement-

Pak ditë më parë, edhe Bashkia e Elbasanit hyri në aksion për të rrëmbyer nga pikat e karburantit të njëjtën tarifë licencimi të cilën Gjykata Kushtetuese e ka shpallur sakaq antikushtetuese.

Në fakt kjo gjykatë e rrëzoi një vendim qeveri të vitit 2015 me arsyetimin se tarifat e tij të larta e bënin atë anitikushtetues. Por qeveria i rishikoi disi tarifat në prill 2017 insiston për futjen në fuqi të ligjit.

Aktualisht Shqipëria ka taksat më të rënda mbi karburantet në rajon, gjë që është reflektuar në çmime gati 30 për qind më të larta të naftës apo benzinës në krahasim me Kosovën apo Maqedoninë.