Shkruan: Eduard Zalonja

1.Fushata e Koço Kokëdhimës për bojkotimin/abstenimin masiv të votimit, duket se ndikoi shumë pak tek votuesit e majtë, sepse rënia e pjesëmarrjes u përqendrua kryesisht tek votuesit e djathtë urbanë.

Në fakt, rreth 73% e 2.2 milionë zgjedhësve që banojnë në Shqipëri, morën pjesë në votim më 25 qershor (krahasuar me 81% në 2013-ën), dhe vetëm 1.9% e fletëve të votimit rezultuan të pavlefshme (krahasuar me 1.6% në 2013-ën).

2.Në garën për kryebashkiakun e Kavajës, kandidati i PD-së doli i pari me vetëm 0.1% diferencë. Ndërkohë, në të njëjtën ditë, në votimin për deputetët e kuvendit, PS-ja doli e para në Kavajë, me 4% epërsi ndaj PD-së…

3.Në qarkun e Vlorës, Vangjel Dule (i treti në listën e PD-së), do të kishte mbetur pa mandat, në qoftë se për PD-në, do të kishin votuar vetëm 830 zgjedhës më pak seç votuan më 25 qershor (mandatin e tij do ta kishte marrë kandidati i 9-të në listën e PS-së). Duket se fushata intensive e kandidatit çam demokrat, Dashamir Tahiri, (i pesti në listën e PD-së) ka rezultuar vendimtare për mandatin e minoritarit Dule…

4.Në qarkun e Tiranës, edhe në qoftë se 12 mijë votues demokratë nuk do të kishin shkuar fare të votonin më 25 qershor, PD-ja do të kishte marrë po aq mandate sa ç’mori (11). Ndërsa siç erdhi puna, në qoftë se zgjedhësit që votuan për PR-në do t’ia kishin dhënë votën aleates PD, mandati i Luan Ramës së LSI-së, do t’i kishte shkuar kandidatit të dymbëdhjetë demokrat. Në fakt, Fatmir Mediu u bëri thirrje të gjithë republikanëve që të votonin vetëm për PD-në (e jo për PR-në), por disa nga republikanët tiranas, nuk e morën mesazhin, duke ndihmuar kështu, pa dashje, Luan Ramën që të siguronte mandatin…

5.Në qarkun e Shkodrës, edhe në qoftë se 12 mijë votues socialistë nuk do të kishin shkuar fare të votonin më 25 qershor, PS-ja do të kishte marrë po aq mandate sa ç’mori (4). Ndërsa siç erdhi puna, në qoftë se PS-në do ta kishin votuar vetëm 1500 nga votuesit e panumërt të Tom Doshit (Doshi mori 5300 vota më tepër seç i duheshin), mandati i Nard Ndokës (i pesti në listën e PD-së) do t’i kishte shkuar kandidatit të pestë socialist…

6.Në qarkun e Kukësit, PS-ja mori pothuaj 12 mijë vota më tepër seç i duheshin për mandatin e vetëm që siguroi, por me 1480 vota më shumë seç mori më 25 qershor, mund ta kishte mbyllur rezultatin e mandateve 2-1 në favor të saj (Safet Gjici do të kishte marrë mandatin e dytë të PS-së)…

7.Në qarkun e Durrësit, PD-ja mori mbi 10 mijë vota më shumë seç i duheshin për 4 mandatet që siguroi. Sidoqoftë, Agron Duka (i pesti në listën e PD-së) do ta kishte marrë mandatin (duke ia hequr LSI-së), në qoftë se 3 mijë votues të djathtë, në vend që të shkonin në plazh më 25 qershor, do të kishin shkuar te kutitë e votimit…

8.Në qarkun e Elbasanit, PDIU-ja mori 11 mijë vota më shumë seç i duheshin për 2 mandatet që siguroi, dhe vetëm për 1850 vota, do të kishte marrë edhe të tretin, gjë që do ta linte pa mandat Edmond Haxhinaston e LSI-së…

9.Në qarkun e Beratit, në qoftë se LSI-në do ta kishin votuar vetëm 1450 zgjedhës më pak seç e votuan më 25 qershor, mandati i dytë i saj do t’i kishte shkuar PD-së, e cila mori vetëm një…

10.Në qarkun e Korçës, në qoftë se LSI-në do ta kishin votuar vetëm 1450 zgjedhës më shumë seç e votuan më 25 qershor, mandati i 4-ët i PD-së do t’i kishte shkuar LSI-së, e cila mori vetëm një…

11.Rritjen më të madhe të votave në rang qarku e shënuan PDIU dhe PSD. Në qarkun e Dibrës, PDIU-ja u rrit nga 250 vota që mori para katër vjetësh, në 12.500 vota më 25 qershor (një rritje 50-fish), duke siguruar kështu 4300 vota më tepër seç i duheshin për mandatin e Reme Lalës. PSD-ja, nga 570 vota që kishte marrë në qarkun e Shkodrës para katër vjetësh, mori 13.100 vota më 25 qershor (një rritje 23-fish), duke siguruar kështu 5300 vota më tepër seç i duheshin për mandatin e Tom Doshit. Në qarkun e Elbasanit, PDIU-ja u rrit nga 12.000 vota që mori para katër vjetësh, në 29.200 më 25 qershor (një rritje pothuaj 3-fish), dhe për 1850 vota, mund të kishte siguruar edhe mandatin e tretë (nga vetëm një që mori në 2013-ën).

12.Rreth 100 mijë zgjedhës, banojnë në zona të Shqipërisë ku nuk e kanë emrin në listat e zgjedhësve – ata janë shpërngulur vetë fizikisht, por figurojnë juridikisht si banorë të qytetit/fshatit të origjinës. Nuk dihet se sa prej tyre e kanë marrë mundimin më 25 qershor, të shkojnë në qendrat e largëta të votimit (ku e kanë patur emrin në listë). Sidoqoftë, sipas raportit të vëzhguesve të OSBE/ODHIR-it, rezultonte se, në 5% të qendrave të votimit të vëzhguara prej tyre, ishin hedhur vota të njerëzve që nuk kishin qenë të pranishëm në ditën e votimit…

13.Në qoftë se zgjedhjet e 25 qershorit, do të ishin zhvilluar me një sistem të pastër proporcional –  pa prag/prim dhe pa përthyerjet e formulës D’Hondt apo të ndarjes së vendit në 12 zona zgjedhore – votimi do të kishte prodhuar një parlament me këtë përbërje deputetësh: 69 të PS-së; 41 të PD-së; 20 të LSI-së; 7 të PDIU-së; 2 të LIBRA-s; 1 të PSD-së (Shihni tabelën shoqëruese).(AFP.al)

Aeroporti “Adem Jashari” ka një kërkesë për udhëtarët që kanë humbur valixhet e tyre

Sponsoruar