Lajme

Macron mbështet Bullgarinë për integrim në zonën euro dhe Shengen

Autori: Gazeta inFokus 21:05 | 06 June 2017

Presidenti francez, Emmanuel Macron i premtoi sot kryeministrit bullgar, Bojko Borisov se do t’i mbështeste përpjekjet e Bullgarisë për t’u afruar dhe integruar në zonën euro dhe hapësirën Schengen, pas përmbushjes së të gjitha kritereve.

Bullgaria, vendi më i varfër i Bashkimit Evropian, që u anëtarësua në vitin 2007, do të përshpejtojë rrugën drejt miratimit të monedhës unike dhe ka ndërmarrë aktualisht një fushatë aktive për të marrë mbështetjen e anëtarëve të zonës euro.

“Çdo herë që do të bëhen përpjekje konkrete, Franca do të jetë përkrah atyre që i aplikojnë dhe ky është rasti”, theksoi Macron, në një deklaratë para shtypit.

-Advertisement-

“Kam vullnetin, shfaqur që në fushatën time, për një integrim më të madh evropian dhe ai arrihet me hapjen e të gjitha vendeve që dëshirojnë të marrin pjesë në këtë integrim”, shtoi presidenti francez, në përfundim të një bisede telefonike me drejtuesin bullgar.

“Kam vënë re vullnetin e vërtetë evropian tek kryeministri bullgar, Bojko Borissov dhe jam i kënaqur për këtë”, nënvizoi ai duke shtuar se do të shkonte në Bullgari para fundit të vitit.

Kryeministri bullgar përshëndeti Emmanuel Macronin për zgjedhjen e tij.

“Në sajë të dinanamizmit tuaj, ne do ta çojmë Evropën përpara. Do të jetë një Evropë e bashkuar dhe e fortë, por mos harroni periferinë”, theksoi Borissov, përcjell Atsh.

Bullgaria do të drejtojë këshillin e Bashkimit Evropian në 2018-n.

Sofja duhet fillimisht të arrijë të integrojë sistemin e kursit të këmbimit ERM2.